Saýytbek Abdrahmanov: Joldaýdyń altyn arqaýy - adamǵa qamqorlyq
«Bizdiń aldymyzda jańa bıikterdi baǵyndyrý mindeti tur. Jańa, qıyn, kúrdeli mindetter tur. Álem ózgerip barady, orynsyz saıasılanyp barady. Saıasat ekonomıkaǵa aralasty. Saıasattyń saldarynan ekonomıkaǵa tikeleı áser etetin, yqpal etetin faktorlar kóbeıip barady. Osyndaı kezde Elbasy Qazaqstannyń ekonomıkasyn halyqtyń ál-aýqatyn jańa satyǵa kóterý úshin naqty usynystardy engizip otyr. Atap aıtqanda, turmysy tómen adamdardyń ál-aýqatyn arttyrý jóninde eń tómengi jalaqyny 1,5 esege ósirý, bıýdjet mekemeleri qyzmetkerleriniń jalaqysyn 35%-ke ósirý sııaqty naqty qadamdar jasalǵaly otyr», - dep atap ótti depýtat.
Onyń aıtýynsha, Joldaýdan keıin barsha jurttyń janyn aýyrtatyn muǵalimniń bedeli men mártebesi týraly másele sheshimin tabady.
«Bir kezderi biz rahmet aıtqanda, yrza bolǵanda, bata bergende «molda bol, balam» dep aıtatyn el edik. Ol zamanda molda bolý - muǵalim bolý degen sóz. Búkil qazaqtyń saýatyn ashqan - moldalar. Ókinishke qaraı, obektıvti jáne sýbektıvti pikirlerge baılanysty muǵalimderdiń mártebesi tómendedi. Aýyldyq jerde qolbalaǵa aınalyp, kez kelgen sharýaǵa aldymen muǵalimdi jegetin jaǵdaı qalyptasty. Endi pedagog mártebesi týraly zań qabyldaǵannan keıin bul máselede naqty ózgerister bolatynyna senemiz jáne Parlament depýtattary retinde onyń ishinde áleýmettik mádenı damý komıtetiniń múshesi retinde bul salaǵa, bul jumysqa mindetti túrde aralasatyn bolamyz», - dedi S. Abdrahmanov.
Eń bastysy, Prezıdenttiń keshegi Joldaýyndaǵy altyn arqaý bop órilip jatqan negizgi ıdeıa - adamǵa qamqorlyq. Onyń ishinde medıtsınalyq qyzmettiń sapasyn arttyrý, naqty aıtqanda onkologııalyq respýblıkalyq ǵylymı ortalyq qurý degen sheshimderdiń barlyǵy da adamǵa qamqorlyqtan órbip jatyr.
Sonymen birge, spıker Joldaýdyń yńǵaıly merzimde jarııalanǵanyn atap ótti.
«Osyǵan deıin biz Joldaý jyldyń basynda, keıde tipti naýryz aıyna beriletinine úırengenbiz. Jyl ishinde atqarylatyn jumysty naýryzdan bastaý nemese tapsyrmalardy qańtarda alý tıimdi emes. Mine qazir qazan aıynyń basynda aıtylyp, mejeler belgilendi. Arnaýly zańdar qajet bolsa, biz qazan, qarasha, jeltoqsan aılarynda ol zańdardy qabyldaı alamyz. Bıýdjetke de ózgeris engize alamyz. Bul óte yńǵaıly», - dep óz sózin túıindedi S. Abdrahmanov.