Saýytbek Abdrahmanov: Alfavıt aýystyrý - onjyldyqtarǵa ǵana emes, ǵasyrlarǵa eseptelgen iri is, tarıhı sheshim

ASTANA. QazAqparat - Latynǵa kóshý - bolashaqtyń tańdaýy. Bul týraly búgin Májiliste «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaýda QR Parlamenti Májilisiniń depýtaty Saýytbek Abdrahmanov málim etti, dep habarlaıdy, QazAqparat tilshisi.

«Biz búgin halqymyz úshin, ultymyz úshin, tilimiz úshin, dilimiz úshin, rýhymyz úshin shyn máninde tarıhı máni bar, taǵdyrsheshti máseleni qarastyryp otyrmyz», - dep atap ótti ol.

Sondaı-aq, depýtat halyqtyń basym bóliginiń ortaq oıy qazaq jazýyn latyn álipbıine kóshirý ýaqyttyń talabyna da, týǵan tilimizdi tyńnan túletý talabyna da saı keledi degenge saıatyndyǵyn aıtty.

«Jańa álipbıdi jasaý kezinde halqymyzdyń, ózge elderdiń san ǵasyrlyq jazba tarıhy zerdelengeni, oǵan latyn jazýynyń klassıkalyq úlgisi basshylyqqa alynǵany jan-jaqty túsindirilýi, bul tańdaýdyń  eń ońtaıly, eń durys tańdaý ekenin daý týǵyzbastaı dáleldeý óte qajetti. Bizdiń aldymyzda talaı jyldarǵa sozylatyn, júıeli, tabandy túrde júrgizýdi qajet etetin qıyn jumys tur. Boıymyzda bar enjarlyqtan, erinshektikten aryla bilsek, erteńimizdi oılaıtyn el ekenimizdi dáleldegimiz kelse, eldigimizdi eńselendirgimiz kelse bul iske táýekelimiz turýǵa tıis. Alfavıt aýystyrý aldaǵy onjyldyqtarǵa ǵana emes, ǵasyrlarǵa eseptelgen iri is, shyn máninde tarıhı sheshim», - dedi Parlament Májilisiniń depýtaty.

Sondaı-aq S. Abdrahmanov jańa álipbı birinshi kezekte kim úshin mańyzdy degen suraqqa toqtalyp ótti. 

«Bul balalar úshin, asa mańyzdy. Jazýymyzdy jańartyp, sanamyzdy silkindirip, eldigimizdi elegemiz kelse, bul iske táýekelge barýymyz kerek», - dep atap ótti ol.