Saýyqtyrý ortalyqtarynyń jazǵy demalysqa daıyndyǵyna monıtorıng júrgizilip jatyr

ASTANA. QazAqparat - Balalar demalysy men bos ýaqytynyń júıeli jáne qaýipsiz uıymdastyrylý daıyndyǵyn baqylaý maqsatynda monıtorıngtik top Almaty oblysy Qonaev qalasyndaǵy «Baldáýren» respýblıkalyq oqý-saýyqtyrý ortalyǵyna bardy, dep habarlaıdy QR oqý-aǵartý mınıstrliginiń baspasóz qyzmeti.

Monıtorıng tobynda Oqý-aǵartý mınıstrligi, Qonaev qalasynyń Tótenshe jaǵdaı, Polıtsııa, Bilim jáne Sanıtarlyq-epıdemıologııalyq baqylaý basqarmalarynyń ókilderi boldy.

Taraptar oqý-saýyqtyrý ortalyǵynyń jazǵy demalysqa daıyndyǵyn, qaýipsizdik sharalary men sanıtarııalyq-epıdemıologııalyq jaı-kúıin, balalardyń qaýipsizdigin qamtamasyz etý, órt qaýipsizdigin saqtaý, quqyq buzýshylyqtar men qylmystardyń aldyn alý jáne balalardyń qaraýsyz qalýyna jol bermeý máselelerin zerdeledi.
Oqý-aǵartý vıtse-mınıstri Edil Ospan jazǵy demalys ýaqytynda balalardy saýyqtyrý, demalysty uıymdastyrý barysynda júıeli vedomstvoaralyq úılestirý jumysyn jalǵastyrý qajettiligine erekshe nazar aýdardy.

«Saýyqtyrý ortalyqtarynyń jazǵy demalasqa daıyndyǵyn baqylaý maqsatynda jumys toptary ár óńirde tıisti sharalardy qolǵa aldy. Zerdeleý jumystary elimizdegi barlyq saýyqtyrý ortalyǵynda júrgiziletin bolady. Bala qaýipsizdigi men densaýlyǵy – úlken basymdyqqa ıe mańyzdy másele. Bul tusta asqan jaýapkershilik tanytyp, birlesip jumys isteýimiz qajet», – dedi Oqý-aǵartý vıtse-mınıstri Edil Ospan.
Aıta keteıik, jazda balalarymyzdyń tynyǵyp, demalysyn jarqyn, kóńildi ótkizýi úshin bıyl qala syrtyndaǵy 218, mektep janyndaǵy 10 200 profıldik jáne shatyrly lager jumys isteıtin bolady.