Saýyq keshinde bı bılegen Fınlıandııa premer-mınıstri esirtkige test tapsyrdy

NUR-SULTAN. QazAqparat – Fınlıandııa premer-mınıstri tanymal adamdarmen birge keshte kóńil kóterip júrgen vıdeosy jelide taraǵannan keıin búkil kúdikten arylý jáne ósek-aıańdy toqtatý úshin esirtkige synaq tapsyrý jóninde sheshim qabyldady, dep habarlaıdy QazAqparat VVS aqparat agenttigine silteme jasap.

Keı saıasatkerler saýyq keshiniń dúbirli ótýine qaraǵanda, ondaǵy keıbir qonaqtar esirtki qoldanýy múmkin degen boljam jasady.

Juma kúni Helsınkıde ótken baspasóz konferentsııasynda 36 jastaǵy Sanna Marın synaqtan ótkenin jáne qorytyndysy kelesi aptada shyǵatynyn aıtty.

Sonymen birge ol eshqashan esirtki qoldanbaǵanyn taǵy da naqtylady.

Marın jınalǵan jýrnalısterge: «Men eshqandaı zańsyz áreket jasaǵan joqpyn. Esirtkini tipti jas kezimde de qoldanyp kórgen emespin», - dedi.

Sondaı-aq jýrnalıster 2019 jyldyń qańtarynan beri qyzmet etip kele jatqan premer-mınıstrden «eger álgi keshte tez ári jaýapty úkimet sheshimin qabyldaý qajet bolsa, qabyldaı ala ma edińiz?» dep surady.

«Tym bolmasa bir ret bolsyn, tún ortasynda Memlekettik keńes saraıyna shuǵyl barýǵa májbúr bolǵan kezim esimde joq. Men óz jumysymdy tıisinshe atqaryp kelemin, keshterge barǵan kezderimde eshqandaı jınalys bolǵan emes», - dep jaýap berdi ol.

Marınniń aıtýynsha, ol ózin vıdeoǵa túsirip jatqanyn kórgen, biraq onyń jelide jarııalanǵanyna qapa bolǵan.

«Meni adamdar durys túsinedi dep sengim keledi, árqaısymyzda jumys ýaqytyna da, demalýǵa da ýaqyt bar», - dep qosty ol.

Foto: www.bbc.com