Saýsaq tańbasy arnaıy júıede saqtalyp, erekshe jaǵdaıda ǵana qoldanylady – ІІM

<p>Іshki ister mınıstrligi adamdardan qujattar úshin saýsaq izin alýǵa qatysty taǵy da túsinikteme berdi, dep habarlaıdy QazAqparat tilshisi.</p>

«2024 jyldyń 1 qańtarynan bastap saýsaq izin alý engizilmeıdi. Saýsaq izin tirkeý týraly zań 2016 jyly qabyldandy. Aıta keteıin, bul Qazaqstannyń jańalyǵy emes, mundaı tirkeý júıesi kóptegen memlekette, sonyń ishinde jetekshi elderde bar. Mysaly, Túrkııa, Ózbekstan saýsaq izin alýdy baıaǵyda engizgen. Saýsaq izin alýdy engizýdegi maqsat – jeke basymyzdy kýálandyratyn qujattarǵa qosymsha bıometrııalyq qorǵaýdy engizý», - dedi Іshki ister mınıstriniń birinshi orynbasary Marat Qojaev Úkimet otyrysynan keıin ótken baspasóz máslıhatynda.

Birinshi vıtse-mınıstrdiń aıtýynsha, búginde saýsaq iziniń ornyna tsıfrlyq fotosýret engizilgen.

«Kelesi kezeń qujattarǵa adamdardyń saýsaq izin engizý. Kópshilikti qyzyqtyratyn saýsaq izderi kodtalǵan belgiler túrinde engiziledi. Saýsaq izderi kez kelgen maqsatqa qoldanylmaıdy jáne ol arnaıy júıede saqtalady. Saýsaqtyń izi qaı adamǵa tıesili ekenin anyqtaýǵa múmkindik beretin arnaıy ıdentıfıkator qajet bolǵan jaǵdaıda ǵana qoldanylady», - deıdi ol.

Eske salsaq, buǵan deıin 2024 jyldyń 1 qańtarynan bastap pasport pen jeke kýálikti rásimdeý kezinde azamattardan saýsaq izi alynatyny týraly habarlaǵan edik.