Saýsaǵyna saqına taǵyp ala almaı qoıǵan 11 jasar qyzǵa qutqarýshylar kómektesti

PETROPAVL. QazAqparat – Petropavlda 11 jasar qyzdyń saqına taqqan saýsaǵy isip ketip, qutqarýshylardyń kómegine júginýge týra keldi, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavlda 11 jasar qyzǵa ájesi kúmis saqına syılaǵan. Alaıda jasóspirimniń qýanyshy kópke barmady. Saqına taqqan saýsaǵy isip ketip, ózdiginen sheshilmeıtin bolǵandyqtan qutqarýshylardyń kómegine júginýge týra keldi.

«22 aqpan kúni tańǵy saǵat 10.00 shamasynda habarlama tústi. Jedel túrde jettik. «Operatsııa» shamamen 4 mınýtqa sozyldy. Mundaı shaqyrtýlarǵa jıi baramyz, tájirıbemiz mol. Keıde altyn, kúmis buıymdardy, er adamdardyń saqınalaryn kesip sheshýge týra kelip jatady. Alaıda kóbine jastardan, sonyń ishinde boıjetkenderden shaqyrtý jıi túsedi», - deıdi SQO TJD jedel qutqarý otrıady qutqarý bólimshesiniń bastyǵy Vıktor Derjanskıı.

Mamannyń aıtýynsha, sońǵy ýaqytta mundaı jaǵdaılar jıiledi. Adamdar unaǵan áshekeıdi tezirek alýǵa tyrysady, kópshiligi onyń ólshemine mán bermeıdi. Saldarynan ýaqyt óte kele saýsaq qyzaryp, isip, solqyldap aýyrady. Mundaı jaǵdaıda saqınany ózdiginen sheshý múmkin emes.

4 kún buryn qutqarýshylar 15 jasar jasóspirimge kómektesip, saqınasyn sheshken.