Saýranda jarty ǵasyr jer astynda saqtalǵan babalar amanaty tabyldy

TÚRKІSTAN. QazAqparat - 1971 jyly urpaqqa amanat etip jazylǵan ósıet hatta maıdanda qaza tapqan erlerdiń esimi kórsetilip, soǵystan keıingi halyqtyń turmysy baıandalǵan, dep habarlaıdy QazAqparat tilshisi.

Jeńis merekesiniń 77 jyldyǵy qarsańynda Saýran aýdany Júınek aýyldyq okrýginde osydan 50 jyl buryn urpaqqa amanat etip jazylǵan ósıet hat saltanatty túrde ashyldy.

Іs-shara barysynda hatta jazylǵan júınektik 149 soǵysqa qatysýshynyń tizimi oqyldy.

Babalardyń ósıet hatyn 1971 jyly S. Azımova esimdi aýyl turǵyny jazyp alyp, arnaıy kapsýlamen jerge kómip, saqtaǵan eken. Sol kezde 10-synyp oqýshysy bolǵan S. Azımova búginde 4 perzenttiń aıaýly anasy, 16 nemereniń ardaqty ájesi atanyp otyr.

Babalar amanaty 4 qabattan turatyn kapsýlaǵa salynǵan. Aldymen qaǵazǵa, sodan keıin polıetılen paketke oralǵan. Munan soń aǵash qorappen qaptalyp, syrtynan temir kapsýla kıgizilipti.

«Soǵysta qaza tapqan jaýyngerlerge qoıylǵan eskertkish mańynda kapsýla salatyn oryn bar. Kapsýlany sol jerden aldyq. Endi biz de osy dástúrdi jalǵastyrýdy josparlap otyrmyz. Erteń Jeńis kúninde qazirgi ómirdi baıandap, keler urpaqqa amanat qaldyrmaqpyz», - deıdi aýdandyq aqsaqaldar alqasynyń múshesi Sabyrjan Azımov.

Atalǵan sharaǵa Saýran aýdanynyń ákimi Ǵanı Rysbekov, oblystyq qoǵamdyq damý basqarmasy «Qoǵamdyq kelisim» KMM-niń basshysy Elmıra Janǵazıeva, sondaı-aq etnos ókilderi, jastar men jergilikti turǵyndar qatysty.