Sáýletshi «Qazaqstan» pavılonyn restavratsııalaý jumysy týraly aıtyp berdi

MÁSKEÝ. QazAqparat - «Qazaqstan» pavılony Halyq sharýashylyǵy jetistikteri kórmesiniń (HShJK) eń kórkem pavılondarynyń biri bolyp tabylady. Osyndaı pikirdi «QazAqparat» tilshisine HShJK-da «Qazaqstan» pavılonynyń restavratsııalyq jumysyna qatysqan qurylys kompanııalary tobynyń jetekshisi Sergeı Zabıra aıtyp berdi.

«Qazaqstan» pavılony Halyq sharýashylyǵy jetistikteri kórmesiniń (HShJK) eń kórkem pavılondarynyń qatarynda. 1960 jyly «Metallýrgııa» pavılonǵa aınalyp, onyń túri parallelepıped pishindes bolǵan edi. Ýaqyt óte kele bári quldyrap, kúmbez ben arka súrilip tastalǵan. Barelefter men kórkemqyshtardyń qaldyǵy ǵana qaldy. Báriniń óńi qashty. Músinder ornalastyrylǵan tuǵyrlardyń barlyǵy da alynyp tastalyp, báriniń keıpi miskin kúıge túsken edi», - deıdi Sergeı Zabıra.

Sáýletshiniiń aıtýynsha, sol jyldary ǵımaratqa qosymsha bir qabat turǵyzylǵan. Qosymsha qurylysqa tehnıkalyq bólmeler men kabınetter engen.

«Biraq, onyń bári qoldanysta bolarlyq kúıde emes edi. Mine, osylaısha, 2017 jyldyń jeltoqsan aıynda biz demontajtaý jasap, bólshekteý jumystaryna kirisip kettik», - deıdi ol.

Osydan keıin bir qabat tolyq alynyp tastalyp, kúmbez ben shatyrdyń qurylymy qalpyna keltirilgen. Burynǵy óńsiz qurylymdardyń barlyǵy qaıta jańǵyrtylǵan. Qazirgi ýaqytta músinderdiń maketteri jasalý satysynda. Jýyq arada olardyń barlyǵy da qaıta ázirlenip, ózderiniń tarıhı tuǵyrlaryna qaıta jaıǵastyrylatyn bolady. Restavratsııalyq jumystar kezinde arhıvtik syzbalar da qoldanylǵan. Barlyq jumystar ǵylymı basshylyqtyń aralasýymen júzege asyrylǵan.

«Búgingi tańda restavratsııalyq jumystar áli de jalǵastyrylýda. Ol jumystar shamamen 5 aıǵa sozylatyn bolady», - deıdi sáýletshi.

«Restavratsııalyq jumystar Qazaqstan Prezıdenti Nursultan Nazarbaevtyń tapsyrmasy boıynsha, Premer-Mınıstrdiń birinshi orynbasary Asqar Mamınniń jáne Qazaqstan Respýblıkasynyń Reseı Federatsııasyndaǵy elshisi Imanǵalı Tasmaǵambetovtyń jiti baqylaýymen bastaldy. Jobany qarjylandyrý bıýdjetten tys qarajattyń esebinen, qazaqstandyq kompanııalardyń aqshasymen iske asyryldy. Osynyń arqasynda HShJK marjany - «Qazaqstan» pavılony qalpyna keltirildi. Ol sózsiz HShJK-nyń eń kórkem pavılondarynyń biri bolyp qalady», - deıdi Sergeı Zabıra.

Avtor: Medet Ahmetov