Sáýle Dosjanovanyń romany halyqaralyq júldege ıe boldy

ASTANA. QazAqparat - Shvetsııanyń Stokgolm qalasynda altynshy ret ótkizilgen Eýrazııalyq halyqaralyq ashyq ádebıet festıvali men kitap forýmynyń baıqaýynda jazýshy Sáýle Dosjanovanyń «Ógeı júrek» romany júldege ıe boldy. Kitaptyń túpnusqasy men aýdarmasy úzdik shyǵarmashylyq jumys bolyp tanylyp, konkýrstyń proza janry boıynsha úshinshi oryndy ıelendi, dep habarlaıdy QazAqparat.

Festıvaldy azat elderdiń talanttaryn shetel oqyrmandarymen tabystyrý maqsatynda  38 memleketten túsken 1600 shyǵarmashylyq jumysty taldap, elekten ótkizgen Eýrazııa shyǵarmashylyq gıldııasy (London) uıymdastyrǵan.

Halyqaralyq baıqaýda Qazaqstandaǵy Baqtygúl Mahanbetova jetekshilik jasap otyrǵan «Bestseller KZ» birinshi ádebı agenttigi usynǵan segiz jumys júlde aldy. Olardyń arasynda qazaq aqyny Ǵalym Jaılybaı «Qara oramal» poemasymen poezııa janrynda úshinshi orynǵa shyqty.

Sáýle Dosjanovanyń «Ógeı júrek» - Moe chýjoe serdtse» (orys tiline aýdarǵan Ǵusman Tóleǵul) kitabynda Qazaqstan Táýelsizdigi arqasynda júzege asyrylǵan medıtsına ǵylymyndaǵy zamanaýı jetistik - júrek almastyrý otasynyń tarıhy jaıynda baıandalady.

«Sheteldik ádebıetshilermen zııatkerlik pikir almasýdy qalyptastyrý, eń aldymen ádebıetshilerdiń shyǵarmalaryn ádebı aýdarý arqyly baılanys jasaý elimizdi álemge tanyta túsýdiń taǵy da bir joly. Aldaǵy ýaqytta qazaq qalamgerleriniń eńbekteri qurlyq asyp, qulashyn jaısyn degen tilektemiz», - deıdi QR Eńbek sińirgen qaıratkeri Sáýle Dosjanova.