Saýl Alvares qazaqstandyq boksshylardyń kúshine tánti boldy

NUR-SULTAN. QazAqparat – Ekinshi orta salmaqtaǵy álemniń absolıýtti chempıony, meksıkalyq Saýl «Kanelo» Alvares qazaqstandyq boksshylardyń kúshine tánti ekenin aıtyp, Qazaqstanǵa sapar shegýdi oılaıtynyn jetkizdi. QazAqparat bul týraly Sports.kz saıtyna silteme jasap habarlaıdy.

«Qazaqstanda óte myqty boksshylar bar. Birneshe apta buryn jattyǵý lagerimizge Qazaqstannan boksshylar keldi. Óte myqty boksshylar. Osyndaı jigitteri bar Qazaqstandy quttyqtaǵym keledi. Aldaǵy taıaý ýaqytta sizderdiń elderińizge mindetti túrde barǵym keledi», - dedi meksıkalyq chempıon.

Aıta keteıik, Suleimen Promotions promoýterlik kompanııasynyń boksshylary San-Dıego qalasyndaǵy (Kalıfornııa shtaty) «Kanelo» zalynda birneshe apta jattyqty.

Qazaqstandyq boksshy Aıdos Erbosynuly absolıýtti chempıon Alvarespen bir aıdan astam ýaqyt sparrıngter ótkizdi.