Sáýirde «Samuryq-Qazyna» qorynda jemqorlyqqa qarsy saraptama júrgiziledi

ASTANA. QazAqparat - «Samuryq-Qazyna» ál-aýqat qorynyń barlyq kompanııalary men uıymdarynda jemqorlyqqa qarsy saraptama júrgiziledi. Bul týraly búgin QR Memlekettik qyzmet isteri mınıstrliginiń Astana qalalyq departamenti Ádep jónindegi keńesiniń birinshi otyrysynda atalǵan departament basshysynyń orynbasary Baýyrjan Jaýbasov málim etti.

«Jemqorlyqqa qarsy is-qımyl týraly jańa zańda Memlekettik qyzmet isteri mınıstrligine memlekettik organdardyń, kvazımemlekettik sektordyń qyzmetindegi jemqorlyq táýekelderine saraptama júrgizý quzireti berilgen. QR Prezıdentiniń tapsyrmasyna sáıkes mundaı saraptama «Samuryq-Qazyna» qorynyń barlyq kompanııalaryna, uıymdaryna, onyń ishinde óńirlerdegi bólimderine de júrgiziledi. Degenmen, olardyń basym bóligi Astanada shoǵyrlanǵan», - dedi ol.

Onyń atap ótýinshe, jemqorlyq qaýpine qatysty saraptama júrgizýdegi basty maqsat uıymnyń normatıvtik-quqyqtyq qyzmetine saraptama jasaı otyryp, qandaı da bir jemqorlyq táýekelderge jol ashatyn problemalardy anyqtaý jáne olardy joıý bolyp otyr.

«Osy maqsattarǵa oraı, jemqorlyq qaýpine qatysty saraptama júrgiziletin bolady. Ol osy jyldyń sáýir aıynda ótkiziledi. Qazirgi ýaqytta mundaı tekserý júrgiziletin qalǵan ulttyq kompanııalardyń tizimin anyqtaý jumystary júrgizilýde», - dedi B.Jaýbasov.

Aıta keterligi, keńes otyrysynda «JerǴÓO» RMK-nyń Astana qalalyq fılıaly qyzmetindegi sybaılas jemqorlyq táýekelderin taldaý nátıjeleri qaralyp, QR QM Memlekettik kirister departamentiniń Astana qalalyq basqarmasy basshysynyń orynbasary A.Dúısenovtiń tártiptik isi qaraldy.