Saýda ortalyqtarynyń qurylysyn sýbsıdııalaý tártibi ózgermek

ASTANA. QazAqparat – Saýda ortalyqtaryn jáne zamanaýı formattaǵy kópfýnktsıonaldy keshenderdi salatyn kompanııalarǵa sýbsıdııa berý tártibi ózgerýi múmkin. Bul týraly ashyq talqylaýǵa shyǵarylǵan «Jeke kásipkerlikti memlekettik qoldaýdyń keıbir sharalary týraly» Úkimet qaýlysynda jazylǵan, dep habarlaıdy QazAqparat tilshisi.

«Saýda ortalyqtaryn jáne zamanaýı formattaǵy kópfýnktsıonaldy keshenderdi salý, jańǵyrtý jobalary boıynsha oblys ortalyqtary men monoqalalardaǵy ortalyqtarynyń saýda alańy keminde 1 myń sharshy metrdi quraǵanda jáne áleýmettik mańyzy bar azyq-túlik taýarlaryn satýǵa arnalǵan oryndary men qoıma úı-jaılary bolǵan jaǵdaıda sýbsıdııalaýǵa jol beriledi», - delingen qujatta.

Aıta keteıik, qoldanystaǵy tıisti qaýlyda mundaı norma joq. Ulttyq ekonomıka mınıstrliginiń málimetinshe, qazir saýda salasynda óz bıznesin keńeıtýge múddeli kásipkerler úshin memlekettik qoldaý sharalary qarastyrylmaǵan. Osyǵan baıanysty bul naryqty jańǵyrtý baıaý qarqynmen júrip jatyr. Sonmen qosa, saýda ortalyqtaryn salatyn kompanııalarǵa nesıe tıimdi mólsherlememen usynylmaıdy. Vedomstvo aqparatyna qaraǵanda, joǵaryda atalǵan sharalarly qabyldaý, qazirgi zamanǵy saýda formattarynyń úlesin ulǵaıtýǵa múmkindik bermek.

Eske sala keteıik, keshe Premer-Mınıstr Álıhan Smaıylov Saýda jáne ıntergratsııa mınıstrliginiń keńeıtilgen alqa májilisinde áleýmettik mańyzy bar taýar satatyn iri ortalyqtardyń qurylysyn yntalandyrýdy tapsyrǵan edi.