Saýda ortalyǵyndaǵy sýburqaqqa sekirgen elordalyq ustaldy
«Polıtsııanyń «102» arnasyna «Mega SilkWay» saýda oıyn-saýyq ortalyǵynyń sýburqaǵyna ekinshi qabattan jas jigittiń sekirgeni týraly habarlama tústi. Elordanyń 19 jastaǵy turǵyny dostarymen bástesip, 1 qabatta ornalasqan sýburqaqqa sekirgen. Qaýipti áreketke ortalyq kelýshileri kýá bolǵan. Jas jigitti saýda oıyn-saýyq ortalyǵynyń kúzetshileri ustap, polıtsııa qyzmetkerine tapsyrdy. Qoǵamdyq tártipti buzýshy Esil aýdandyq polıtsııa bólimine jetkizildi», - delingen Nur-Sultan qalalyq polıtsııa departamentiniń aqparatynda.
Quqyq buzýshynyń ústinen QR Ákimshilik quqyq buzýshylyq týraly kodekstiń 434-babymen ákimshilik is qozǵaldy. Mamandandyrylǵan aýdanaralyq ákimshilik sotynyń sheshimimen ol qamaýǵa alyndy. Ustalǵan jigit buǵan deıin Almaty metrosynda mýzyka daýysyn qatty qoıyp, kishigirim buzaqylyq jasaǵan úshin jaýapkershilikke tartylǵan.