Saýda mınıstrligi qant baǵasyn turaqtandyrý úshin bıýdjetten kómek suramaq

NUR-SULTAN. QazAqparat – QR Saýda jáne ıntegratsııa mınıstri jýrnalısterge Serik Jumanǵarın qant naryǵyn qalaı retteıtini týraly paıymyn aıtty, dep habarlaıdy QazAqparat tilshisi.

«Sońǵy ret Small saýda ortalyǵyna bardym. 5 kılogramdyq qaptaǵy qant 5,5 myń teńge boldy. Bul óte qymbat. Birinshiden, qant ta, ózge azyq-túlik ónimderi de jetkilikti bolýy kerek. Ekinshiden, baǵany túsirýge tyrysý kerek nemese ósimniń qarqynyn azaıtý qajet. Bizdiń óz paıymymz bar. Premer-Mınıstr tapsyrma berdi. Kelesi aıdyń sońyna deıin áleýmettik mańyzy bar 19 túrli taýardyń árqaısysy boıynsha qalaı áreket etetinimiz týraly jospar ázirleımiz. Týra bir saǵattan keıin úlken jınalys ótkizemiz. Búkil qant naryǵynyń ókilderi qatysady. Qant jetkilikti, baǵasy turaqty bolý úshin, ony túsirý úshin ne isteý kerektigi týraly paıymymyz bar. Sizderge ýáde bergenimdeı, eki apta kóleminde osy máselemen aınalysyp jatyrmyz. Keler aptanyń sońynda óz paıymymdy aıtam», - dedi mınıstr.

Sondaı-aq, qant baǵasyn turaqtandyrý úshin bıýdjetten kómek suraýy múmkin ekenin aıtty.

«Naryqqa uıat týraly, halyq týraly úgit aıtýǵa bolady. Biraq naryq ózine tıimdi jaǵdaıda ǵana jumys isteıdi. Sondyqtan bul jerden «bıshik» tásili júrmeıdi. Jumys istep, naryq tetikterin qoldanamyz. Árıne, bıýdjet tetikterin de qoldanamyz. ıAǵnı keshendi tásil kerek», - dedi Serik Jumanǵarın.