Saýda mınıstrligi Eýrazııalyq odaqtaǵy jasyryn kedergiler týraly aıtyp berdi

NUR-SULTAN. QazAqparat – QR Saýda jáne ıntegratsııa mınıstrligi Eýrazııalyq ekonomıkalyq odaqtaǵy qazaqstandyq taýarlarǵa qoıylǵan kedergilerdi anyqtap, joıý jumystaryn júrgizip jatyr. Bul týraly Saýda jáne ıntegratsııa vıtse-mınıstri Janel Kýshýkova aıtyp berdi, dep habarlaıdy QazAqparat.

«Mınıstrlik qazaqstandyq taýarlar jolyndaǵy kedergilerdi anyqtaý jáne joıý boıynsha belsendi jumys júrgizýde. Qazirgi ýaqytta tosqaýyldardy joıýdyń rekordtyq oń dınamıkasyn atap ótýge bolady. Mysaly, 2016 jyldan bastap biz buryn bolǵan nemese kedergi dep tanylǵan máselelerdiń 83%-yn joıdyq. Osylaısha, 66 tosqaýyldy anyqtadyq, olardyń 54-i joıyldy. Saraptamalyq baǵalaýlar boıynsha, biz túzetken tosqaýyldar elimizge shamamen 100 mln AQSh dollaryna eksport ósimin qamtamasyz etedi», - dedi J. Kýshýkova Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, kedendik shekaralar ashylǵanymen, keı elder óz óndirýshilerin EAEO basqa qatysýshylarynyń básekesinen qorǵaýdy jalǵastyryp keledi.

«Kóbinese jasyryn kedergiler básekeniń joǵary deńgeıi bar taýarlarǵa qatysty ornatady. Bul árıne ekonomıkalyq ıntegratsııa ıdeıasyna qaıshy keledi jáne biz munymen kúresemiz», - deıdi J. Kýshýkova.

Buǵan deıin spıker Qazaqstannyń Eýrazııalyq ekonomıkalyq odaq elderine eksporty 25%-ǵa óskenin aıtqan bolatyn.

Sonymen birge, Eýrazııalyq ekonomıkalyq odaq elderine taýar eksporttaıtyn qazaqstandyq jetkizýshilerdiń basym bóligi shaǵyn jáne orta bıznes ókilderi ekeni málim etildi.

Eýrazııalyq ekonomıkalyq odaq Qazaqstannyń úshinshi elderge de eksport kólemin ulǵaıtýǵa kómektesti.