Saýda mınıstrligi áleýmettik mańyzy bar azyq-túlik baǵasy qalaı tejeletinin aıtty
Mıınstrlik ishki saýdany damytý máselelerine júıeli jáne naqty tásilderine mán beretin bolady. Birinshiden, áleýmettik mańyzy bar azyq-túlik taýarlaryna baǵany tejeý jáne olardyń ósý sebepterin kezeń-kezeńimen joıý maqsatynda mınıstrlik Aýyl sharýashylyǵy mınıstrligimen jáne jergilikti atqarýshy organdarmen birlese otyryp, aýqymdy jumys júrgizýde. Osy jyldyń 2 sáýirinde «Bıznes ortany damytý jáne saýda qyzmetin retteý týraly» zań qabyldandy. Ol baǵany turaqtandyrý men tejeýdiń jańa sharttaryn qarastyrady», - dedi vıtse-mınıstr vedomstvonyń Memleket basshysynyń taıaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Ekinshi, onyń atap ótýinshe, osy jyldyń 16 tamyzynan bastap ishki saýda qaǵıdalaryna engizilgen ózgerister otandyq óndirýshiler úshin óz taýlarlaryn basqa barlyq saýda nysandarynda ornalastyrý múmkindigin qarastyrady. Osy maqsatta ishki saýda sýbektilerine otandyq azyq-túlik taýarlary úshin «Qazaqstanda jasalǵan» degen arnaıy belgisi bar kem degende 30 paıyz sórelik keńistik nemese saýda alańdaryn usyný mindetteledi.
«Úshinshi, baǵany turaqtandyrýdyń taǵy bir sharasy – áleýmettik mańyzy bar azyq-túlik taýarlaryna saýda ústemesin keminde 15 paıyz shekteý. Munan basqa saýda jelileri osy taýarlardy jetkizýshilerden syıaqy óndirip ala almaıdy. Al qalǵan basqa azyq-túlik túrleri boıynsha 5 paıyzdan kóp emes mólsherde belgileı alady», - dedi ol.
Azamat Asqarulynyń aıtýynsha, qazirgi kezde mınıstrlik tutynýshy quqyqtaryn qorǵaý týraly zań jobasyn ázirleýde. Onda ákimdikter jáne tutynýshylardy qorǵaý departamentteriniń ókilderi saýda erejelerin buzǵan ishki saýda sýbektileriniń jaýapkershiligin qarastyrady.
«Sonymen qatar ákimdikter saýda jelileri úshin áleýmettik mańyzy bar azyq-túlik taýarlaryn tirkelgen baǵa boıynsha satýdyń qarsy mindettemelerin belgileı otyryp, jeńildikti qaryz berýge múmkindikteri bar. Bul tetik ózin ótken jyly jetkilikti túrde dáleldedi. Ótken jyldan Nur-Sultan jáne Almaty qalalarynda osyndaı oń tájirıbe bar. Sonyń nátıjesinde baǵany naryqtyq baǵadan tómen deńgeıde tejeý qamtamasyz etildi», - dedi vıtse-mınıstr.