Saýda mınıstrligi un baǵasyn arzandatý úshin ne istep jatyr

<p>Saýda jáne ıntegratsııa mınıstrligi júrgizgen monıtorıng qorytyndysy boıynsha kóterme jáne bólshek saýdada un baǵasynyń ósýi toqtady, dep habarlaıdy <a href="https://kaz.inform.kz/" target="_blank" rel="noopener">QazAqparat</a> atalǵan vedomstvonyń baspasóz qyzmetine silteme jasap.&nbsp;</p>

Mınıstrliktiń resmı aqparatynda aıtylǵandaı, saýda zańnamasyn buzýdyń saldaryn túsindirý arqyly bıznestegi alypsatarlyqty toqtatýǵa qol jetkizildi. Mysaly, Jambyl oblysynda 27 qyrkúıekte ótken keńeste Saýda jáne ıntegratsııa mınıstri Arman Shakqalıev óńirler men «Azyq-túlik korporatsııasy» AQ aldyna 2 kún ishinde ishki naryqty arzandatylǵan astyqpen qamtamasyz etý jónindegi memorandýmǵa qol qoıý mindetin tapsyrǵan.

Atalǵan tapsyrmany tıimdi iske asyrý úshin «QTJ-JT» JShS-men astyqty el ishinde tasymaldaýdy basym baǵyt retinde aıqyndaý týraly ýaǵdalastyqqa qol jetkizildi. Sonymen qatar Saýda mınıstrligi óńir ákimdikteriniń álsiz jumysyn atap ótip, tek Túrkistan oblysynyń ákimdigi ǵana jóneltý boıynsha qujattarǵa qol qoıyp, un tartý operatoryn anyqtap, aldyn ala tólem jasaǵanyn málim etti.

Habarlamada tek 3 óńirdi un tartýshy operatorlar (Pavlodar, Qyzylorda oblystary jáne Shymkent qalasy) usynǵany aıtylǵan. Al memorandýmǵa tek alty óńirde (Qaraǵandy, Pavlodar, Túrkistan oblystary, Ulytaý oblysy, Shymkent qalasy, Astana qalasy) qol qoıylǵan.

«SQO-da un baǵasynyń ósýine jáne tapshylyǵyna jol bermeý úshin «Soltústik» ÁKK» AQ DEZ JShS-men 1 jyl merzimge 4 myń tonna un satyp alýǵa kelisimshart jasaldy. Kompanııa «Soltústik «ÁKK» AQ ótinimi boıynsha ónim jetkiziledi. Unnyń bir bóligi áleýmettik nan pisirýge berilse, qalǵan bóligi satýǵa jiberiledi», - deıdi mınıstrlikten.

Odan bólek, mınıstrlik Básekelestikti qorǵaý jáne damytý agenttigimen baǵanyń kúrt ósýin eskere otyryp, baǵa kelisimi jáne naryqqa qatysýshylardyń básekelestikke qarsy is-qımyldary turǵysynan tekserýler júrgizý, sondaı-aq monopolııaǵa qarsy zańnama sheńberinde tıisti sharalar qabyldaý máselesi pysyqtap jatyr.

«Qarjy mınıstrliginiń Memlekettik kirister komıtetine 1-surypty undy ótkizý kezinde saýda ústemesiniń 15% anyqtaý turǵysynan suraý jiberildi. Un baǵasynyń qymbattamaýy ákimdikter, «Azyq-túlik korporatsııasy AQ jáne QTJ astyqty óńirlerge jetkizý boıynsha arzandatylǵan astyq alýdy jedeldetýge baılanysty. Úkimet tarapynan barlyq úılestirý jáne uıymdastyrý jumystary júrgizildi», - delingen habarlamada.