Saýda mınıstri vaktsınalaý ekonomıka ósimine qalaı áser etetinin aıtty

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov halyqty vaktsınalaý qarqynynyń eldiń saýda salasyna yqpaly týraly aıtty, dep habarlaıdy QazAqparat tilshisi.

«Saladaǵy ósim qarqynyna halyqty jappaı vaktsınalaý nátıjesinde karantın men shekteý is-sharalarynyń jeńildeýi ońtaıly áser etedi. Muny álemdik sarapshylar da rastap otyr», - dedi B. Sultanov onlaın rejımde halyq aldynda esep berýi kezinde.

Osy oraıda ol Halyqaralyq valıýta qorynyń esep-qısabyn mysal retinde keltirdi.

«Halyqaralyq valıýta qorynyń dereginshe, 2021 jyly vaktsınalaý qarqyny boıynsha kósh bastaǵan elderde, ıaǵnı halyqtyń 50 paıyzyna ekpe salynǵan memleketterde ekonomıka ósimi 5,7 paıyz deńgeıinde bolady dep kútilýde. Sonymen qatar, halyqtyń tórtten biri vaktsınalanǵan damyǵan elderde bıyl ekonomıka ósimi 3,3 paıyz shamasynda bolady dep eskerilgen», - dedi mınıstr.

«HVQ esepteýi boıynsha bizde ekonomıkalyq ósim 3,2 paıyz deńgeıinde bolady dep aıtylǵan. Eger de halyq vaktsına salýda belsendilik tanytsa, bizde ekonomıka ósimi men saýda kólemi artady», -dedi B. Sultanov.