Saýda mınıstri naryqty azyq-túlikpen tolyqtyrý qadamyn aıtty

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov saýda salasyndaǵy barsha qurylymdyq ózgeristerdiń basty maqsatyn aıtty, dep habarlaıdy QazAqparat tilshisi.

«Naryqty júıeli túrde ónimmen tolyqtyrýǵa joǵary suranystaǵy taýarlar óndirisi men qaıta óńdeýdi yntalandyrý is-sharalary yqpal etedi. Bul óz kezeginde salalyq memorgannyń maqsaty. Osy mindet Jol kartasynda kórsetilgen. Saýda salasynda júrgizilip jatqan qurylymdyq ózgeristerdiń basty maqsaty – erkin básekelestikti, taýardyń kedergisiz tasymalyn, saýda aǵyndarynyń turaqtylyǵyn qamtamasyz etý. Ásirese, azyq-túlik ónimderine ekpin qoıylǵan jón», - - dedi B. Sultanov onlaın rejımde halyq aldynda esep berýi kezinde.

Osy oraıda ol bul baǵytta tıisti tapsyrmany Memleket basshysy júktegenin eske saldy.

«Barsha júıeni retke keltirý naryq oıynshylary arasyndaǵy kemshilikterdi joıýǵa yqpal etedi jáne ádil baǵa qalyptastyrýǵa múmkindik beredi», - dedi mınıstr.

Budan buryn habarlanǵandaı, Baqyt Sultanov Saýda jáne ıntegratsııa mınıstriliginiń basty maqsatyn atady.