Saýda mınıstri kókónis baǵasyna qatysty túsinik berdi
«Aldymen ishki saýda salasynyń damýy týraly qysqasha aıtyp ótken jón. Barlyq kórsetkishter oń dınamıkany dáleldep otyr. Máselen, saýdanyń naqty kólem ındeksiniń kórsetkishi 109,1%-dy qurap, pandemııaǵa deıingi jyldardyń kórsetkishterinen de joǵary. Osy úrdisterdi rastaıtyn elektrondyq kommertsııadaǵy jaǵdaıdy aıtýǵa bolady. Jyl qorytyndysy boıynsha elektrondyq saýdany 10%-ǵa deıin jetkizý josparlanǵanymen, búgingi kúni osy kórsetkish 12,2%-dy qurady», - B. Sultanov.
Onyń aıtýynsha, áleýmettik mańyzy bar azyq-túlik taýarlarynyń baǵalary jyl basynan beri 10,3 paıyzǵa ósti.
«Maýsymaralyq kezeńde baǵanyń ósýi baıqalatyn kókónister, ımportqa táýeldi ónimder, sondaı-aq joǵary eksporttyq suranysy bar taýarlar eń joǵary ósim kórsetti. Óńirlerdegi qalyptasqan jaǵdaı boıynsha, eń joǵarǵy ósim 12 % Túrkistan oblysynda, 11,6% – Nur-Sultan qalasynda jáne 11,4% Qaraǵandy oblysynda tirkeldi. Degenmen sáýir aıynan baıqalǵan baǵalardyń ósimi turaqtanyp, al trendi tómendeýge burylǵanyn kórip otyrmyz. Máselen, kartop baǵasynyń maýsymdyq ósýi sáýir-maýsym aralyǵynda belgilendi. Budan ári, ońtústik aımaqtardaǵy erte pisetin kartoptyń túsimi ulǵaıǵan saıyn, ónimniń baǵasy tómendedi. Eń joǵary ósý sátinen bastap, baǵalar 26%-ǵa nemese 54 teńgege tústi», - dedi mınıstr.
Tamyz jáne qyrkúıek aılarynda soltústik aımaqtarda ónimniń jappaı jınalýy kútilýde, bul ishki naryqty kartoppen tolyqtyrady jáne baǵanyń odan ári tómendeýin yntalandyrady.
«Egin jınaý kezeńinde 577 myń tonna sábiz túsimi kútilýde. Bul sábizdiń baǵasyn edáýir túsirýge yqpalyn tıgizedi. Pııaz ben qyryqqabat baǵalarynyń ósýi áli de baıqalady. Málimetterge sáıkes, pııaz ben qyryqqabat boıynsha jappaı egin jınaý tamyz aıynyń sońy men qyrkúıektiń basynan bastalady. Tıisinshe, baǵanyń tómendeýi tek aǵymdaǵy aıdyń sońynda bolady», - dedi B. Sultanov.
«Biz baǵa turaqtandyrýdyń negizgi quraldaryna taldaý júrgizdik. Nátıjeleri óńirlerde turaqtandyrý qorlaryna taýarlardy satyp alýǵa qarajattyń durys bólinbegenin jáne mehanızmdi tıimsiz paıdalanýdyń áli de faktileri bar ekenin kórsetti. Biz buryn baıandaǵandaı keıbir óńirlerde táýekeli joǵary ónimderge mán berýdiń ornyna, baǵalary turaqty taýarlar satyp alynǵan. Mysaly, qarajattyń 37 paıyzdy undy satyp alýǵa jumsaldy. Onyń baǵasy bizde turaqty. Sondaı-aq, dástúrli túrde ınflıatsııa sheginde ǵana qymbattaıtyn tuz jáne sút ónimderi sııaqty taýarlar satyp alyndy. Ákimdikter qarajatty táýekeli joǵary jáne baǵalary qubylmaly áleýmettik mańyzy bar taýarlarǵa shoǵyrlandyrý qajet», - dedi ol.