Saýda mınıstri azyq-túlikti qymbattatpaý joldaryn aıtty

NUR-SULTAN. QazAqparat – QR Saýda jáne ıntegratsııa mınıstri Baqyt Sultanov azyq-túlik pen taýar baǵasynyń qymbattamaýy úshin qolǵa alynýy tıis sharalar týraly aıtty, dep habarlaıdy QazAqparat.

«Koronavırýs pandemııasynyń kelesi tolqyny men jańa jyl qarsańyndaǵy dástúrli baǵanyń ósý qaýipin eskere otyryp, baǵany tejeý boıynsha mynadaı sharalar qabyldaý usynylady. Birinshiden, ákimdikter turaqtandyrý qorlaryndaǵy azyq-túlik kólemi men túrlerin qaıta qarap, «aınalym shemasy» boıynsha qarjylandyrýdy keńeıtý kerek. Ekinshiden, Aýyl sharýashylyǵy mınıstrligi áleýmettik mańyzy bar azyq-túlik taýarlarynyń baǵasyn turaqtandyrý úshin Azyq-túlik korporatsııasy bazasyndaǵy bıdaı rezervterin qadaǵalaýy qajet», - dedi Baqyt Sultanov Úkimet otyrysynda.

Úshinshiden, mınıstr ákimdikterge shekti ruqsat etilgen bólshek saýda baǵasyn belgileýdi usyndy. Sondaı-aq, baǵalardyń negizsiz ósýin baqylap, shekti baǵanyń saqtalýyn qamtamasyz etý qajet.

Buǵan deıin B. Sultanov azyq-túliktiń eń qymbat baǵasy Nur-Sultanda tirkelgenin aıtyp, shekti baǵa belgileý quralyn paıdalanbaı otyrǵan ákimdikterdi synaǵan edi.