Saýda mınıstri áýejaıda Bıbigúl Tólegenovaǵa qatysty oqıǵaǵa pikirin bildirdi

<p>ASTANA. KAZINFORM &ndash; Saýda jáne ıntegratsııa mınıstri Arman Shaqqalıev halyq ártisi Bıbigúl Tólegenovany ushaqqa otyrǵyzý kezinde bolǵan oqıǵaǵa qatysty túsinik berdi.</p>

Buǵan deıin áleýmettik jelide Leka Saveleva Air Astana áýe kompanııasynyń prezıdenti Pıter Fosterge ashyq hat jazǵan. 

Onyń muzmunyna qarasaq, kompanııa qyzmetkerleri halyq ártisi Bıbigúl Tólegenovany ushaqqa dereý otyrǵyzbaǵan jáne dórekilik tanytqan.

Bul turǵyda A. Shaqqalıev bolǵan jaıtqa qatysty Mádenıet jáne aqparat mınıstri Aıda Balaevanyń pikirin quptaıtynyn aıtty.

«Bul turǵyda tıisti erejeler bar ekeni túsinikti, biraq máseleniń etıkalyq jaǵyna da qaraǵan jón. Ol kisige ushaqqa jetý qıyn boldy. Meniń oıymsha, osy jaǵdaıda áýejaı qyzmetkerleri túsinikpen qarap, qoldaý kórsetýge bolar edi. Atap aıtqanda, júrip-turýy qıyn kez kelgen basqa da adamdarǵa qamqorlyqpen qaraǵany jón», - dedi mınıstr Senattyń jalpy otyrysynan keıin tilshiler suraǵyna jaýap bere otyryp.

Aıta keteıik, Air Astana kompanııasy halyq ártisi Bıbigúl Tólegenovamen bolǵan jaıtqa qatysty túsinikteme berdi.