Saýda bazarlarynyń qyzmetin lıtsenzııalaý engizilmek

ASTANA. QazAqparat – Elimizde saýda bazarlarynyń qyzmetin lıtsenzııalaý máselesi pysyqtalyp jatyr. Bul jaıynda Senat depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta «Qazaqstan Respýblıkasynyń keıbir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly» Zań jobasy aıasynda Saýda jáne ıntegratsııa mınıstrligine Kásipkerlik kodeksine sáıkes sýbektige (obektige) bara otyryp, profılaktıkalyq baqylaý nysanynda saýda qyzmetin retteý týraly zańnamanyń saqtalýyn baqylaýdy júzege asyrý jónindegi quzyretti berý bóliginde zańnamalyq aktilerge ózgerister qarastyrylyp jatyr. Osyǵan baılanysty saýda bazarlarynyń qyzmetin lıtsenzııalaýdy engizý máselesi pysyqtalýda», - dedi Úkimet basshysy jaýabynda.

Onyń atap ótýinshe, saýda bazarlarynyń qyzmetin lıtsenzııalaý halyqtyń sanıtarııalyq-epıdemıologııalyq salamattylyǵy, jerdi paıdalaný men qorǵaý, veterınarııa jáne órt qaýipsizdigi salalarynda memlekettik baqylaý men qadaǵalaý tetikterin qosymsha qatańdatý qajettiligin boldyrmaıdy.

«Saýda bazarlary úshin biryńǵaı ruqsat qujatyn belgileý ýákiletti organdarǵa belgilengen talaptardyń buzylýyn anyqtaýǵa múmkindik beredi», - dedi ol.