Saýd Arabııasynda ál-Farabıdiń 1150 jyldyǵyna arnalǵan halyqaralyq konferentsııa ótti

RIıAD. QazAqparat – Qazaqstannyń Saýd Arabııasyndaǵy Elshiligi Korol Feısal atyndaǵy Islamdyq zertteý ortalyǵymen birlesip, ál-Farabı atyndaǵy Qazaq ulttyq ýnıversıtetiniń qoldaýymen «Ábý Nasr ál-Farabıdiń adamzat órkenıetiniń damýyna qosqan úlesi» taqyrybynda halyqaralyq konferentsııa ótkizdi, dep habarlaıdy QR SІM baspasóz qyzmeti.

Іs-shara jumysyna Korol Feısal atyndaǵy Islamdyq zertteýler ortalyǵynyń basqarma tóraǵasy hanzada Týrkı ál-Feısal ál Saýd, Islam yntymaqtastyǵy uıymy Bas hatshysynyń ǵylym jáne tehnologııa máseleleri jónindegi orynbasary Asqar Mýsınov, QazUÝ rektory Ǵalymqaıyr Mutanov, ıraktyq jazýshy Rashıd ál-Haıýn, Qazaqstan Ulttyq Ǵylym akademııasynyń akademıgi, professor Ábsattar qajy Derbisáli, birqatar saýdtyq fılosoftar men ǵalymdar qatysyp, baıandamalar jasady.

Konferentsııa ashylýynda sóz sóılegen Elshi Berik Aryn kúlli musylman jurtynyń maqtanyshy, Ábý Nasyr ál-Farabıdiń murasyn dáripteý jáne álemge pash etý maqsatynda Qazaqstanda jáne shet elderde ótip jatqan keń aýqymdy mereıtoılyq jáne ǵylymı-praktıkalyq sharalar týraly aıta otyryp, olardyń, Memleket basshysy atap ótkendeı, rýhanı jańǵyrýda jáne jastardyń qundylyqtaryn qalyptastyrýda erekshe mańyzǵa ıe ekenin aıtty.

Sonymen qatar, dıplomat ǵalym babamyzdyń mırasy týraly Tuńǵysh Prezıdent – Elbasy Nursultan Nazarbaev «Uly oıshyl ál-Farabı esimi elimizdiń ımıdjin álemdik deńgeıge kóterýge yqpal etetin asa qundy rámizdik kapıtal» dep atap ótkenin jetkizdi.

Óz kezeginde hanzada Týrkı ál-Feısal ál-Farabıdiń álemdik deńgeıdegi kemeńger tulǵa ekendigin jáne onyń eńbekteri adamzat órkenıetiniń damýyna orasan zor úles qosqanyn ataı otyryp, ony ıslamdyq fılosofııanyń negizin qalaýshylardyń biri jáne jahandyq bilim men ǵylymdy janjaqty baıytýǵa oń serpin bergen ǵulama ustaz dedi.

A. Mýsınov osy mereıtoıǵa oraı IYU sheńberinde atqarylyp jatqan sharalar, sonyń ishinde ú.j. 27-28 qarashada Nıger Respýblıkasynyń astanasy Nıameıde ótken Uıymǵa múshe memleketter Syrtqy ister mınıstrleri keńesiniń 47-shi sessııasy barysynda qazaq tarapynyń usynysymen ál-Farabıdiń 1150 jyldyǵyn uıym sheńberinde merekeleýge qatysty bastamalary qoldaý taýyp, arnaıy qarar qabyldanǵandyǵyn habarlady.

Sóz alǵan basqa qatysýshylar ál-Farabıdiń ómir joly men ǵylymı eńbekterine qatysty ózderi júrgizgen izdenisteri týraly jan-jaqty baıandady. Osy rette Korol Feısal atyndaǵy ortalyqtyń sırek kitaptar bóliminiń basshysy Omar Tamalat ortalyq qorynda ál-Farabıdiń birneshe eńbeginiń qoljazbalary men 90-ǵa jýyq kóshirmeleriniń saqtalǵandyǵyn, habarlap, olardy qazaqstandyq ǵalymdar óz izdenisterinde paıdalanýyna bolatynyn málimdedi.