Saýd Arabııasynan Qazaqstanǵa qundy jádigerler jetkizildi

ASTANA. QazAqparat - Memleket basshysy N.Á. Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda halyqaralyq deńgeıdegi mańyzdy is-shara júzege asyrylyp, Qoljazbalar jáne sırek kitaptar ulttyq ortalyǵy qundy jádigerlermen tolyqty, dep habarlady QR Mádenıet jáne sport mınıstrliginiń baspasóz qyzmeti.

Ortalyqqa «Er-Rııad, Saýd Arabııasy Koroldigi, Orys-arab zertteýleri jáne aqparat qory, Islam isteri mınıstriniń keńesshisi Doktor Majıd Ben Ábdel Ázız Ben Naser At-Túrkı arnaıy baǵdarlama boıynsha jınaqtalǵan VI-VII ǵasyrlardan bastap búgingi XX ǵ. deıin ómirden ótken ǵalymdardyń eńbekteriniń qoljazba kóshirmesi jınaqtalǵan hard dıskti tabys etti.

Dıskide arab tiliniń tarıhy, mádenıeti men ádebıeti, oqý salasyndaǵy grammatıkasy, fıqh, hadıster, Quran tápsirleri jáne úlken toptardyń shejirelerin qamtıtyn 3 tildegi (arab, kónemusylman, parsy, aǵylshyn) 500000-nan astam qoljazbalar jınaqtalǵan. Osy atalǵan taqyryp boıynsha qazaq jerinen shyqqan ǵulamalardyń da qoljazba eńbekteri, aıtap bolsaq, ál-Farabıdiń birneshe eńbekteri jáne Túrkistannan, Syǵanaqtan shyqqan ǵalymdardyń da eńbekteri bar. Sondaı-aq, Qoja Ahmet ıAssaýıdiń «Shejirenassabnama» eńbegi tolyǵymen qamtylǵan. Bul qoljazbalar tek arab tilinde emes parsy, shaǵataı, kóne túrki tilinde jáne tóte jazýmen jazylǵan.

Kezdesý sońynda «Qoljazbalar jáne sırek kitaptar ulttyq ortalyǵy» RMM dırektory Asylhan Jumabaıuly Sadýov pen Islam isteri mınıstriniń keńesshisi doktor Majıd Ben Ábdel Ázız Ben Naser At-Túrkı Yntymaqtastyq kelisimshartyna qol qoıdy.