Saýd Arabııasy munaı óndirý kólemin arttyrmaq - BAQ

NUR-SULTAN. QazAqparat – Eger Reseı sanktsııalarǵa baılanysty munaıdy az óndire bastasa, Saýd Arabııasy batys elderi úshin munaı óndirýdi arttyrýǵa daıyn ekenin aıtty. Bul týraly QazAqparat Financial Times gazetine silteme jasap habarlaıdy.

Basylym málimetinshe, Saýd Arabııasy munaı naryǵyndaǵy shıelenisti jaǵdaıǵa qaramastan, naqty tapshylyq joq dep esepteıdi. Alaıda EO sanktsııalaryna baılanysty Reseıde munaı óndirisi tómendegen jaǵdaıda janarmaı tapshylyǵynyń yqtımaldyǵy artady.

Basylymnyń habarlaýynsha, Saýd Arabııasy men BAÁ-de tez arada munaı óndirýdi arttyrý máselesi talqylandy. Dıplomatııalyq derekkóz Financial Times-qa bul sheshim beısenbide OPEK+ otyrysynda jarııalanýy múmkin ekenin aıtty. Biraq ol áli tolyq qabyldanǵan joq.

Kelisimge qol jetkizilgen jaǵdaıda qyrkúıekke josparlanǵan munaı óndirýdi ulǵaıtý shilde men tamyzǵa aýystyrylatyn bolady.