Saýatsyz emespin: Ádep keńesine kelgen aqtóbelik sheneýnik óz isin túsindirdi
Búgin oblystyq memlekettik qyzmet isteri janyndaǵy Ádep keńesi birneshe memlekettik qyzmetkerlerge qatysty tártiptik isti qarady. Áıteke bı aýdandyq bilim bóliminiń basshysy Qanysh Jarymbetov eń birinshi bolyp jaýap berdi.
«QR Sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti E.Myrzabaevtyń aryzy negizinde Áıteke bı aýdandyq bilim bóliminiń basshysy Qanysh Jarymbetovke qatysty para alý faktisi boıynsha qylmystyq is qozǵalǵan. Aryzdy qaraý barysynda Q.Jarymbetov Áıteke bı aýdanynyń 22 mektebi pen 1 ınternatyna beınebaqylaý kamerasyn qondyrý kezinde 40 mln teńge jumsalatynyn, Memlekettik satyp alý konkýrsy kezinde jeńimpaz retinde taný jáne ári qaraı qamqorshylyq tanytý úshin 7 000 000 teńge talap etkeni aıtyldy. Alaıda qylmystyq is 2021 jyldyń 1-aqpany kúni qylmystyq quqyq buzýshylyq quramynyń bolmaýyna baılanysty toqtatyldy. «Whatsapp» jelisi arqyly hat almasý jazbalarynda E.Jarymbetov: «Ótkendegi bar degen degenın kerek», «Sen onda sheship daıyndap qoı», «Men ózim almaım», «Adam jiberem», «Men qolǵa almaım. Gospyn go», «Áńgime bolyp ketedi.Bere almasan srazý aıt», «Qolyma tıgende habar berem», «SMS oshır», «Maǵan telefonmen áńgime aıtpa»; E.Mýrzabaev: «Qashanǵa? Bankten sheshý kerek, kansha?» «Ozıne bere salaıyn», «Ortaǵa eshkimdi qospaı». «Mende daıyn», «Qazir sheship qoıam» «Hattaǵy jazylǵan habarlama sol kúıi berildi – red.) dep jazyp, keıin ony «Erkin kúres» sport kesheniniń aldyna saǵat 10:00-ge kezdesýge shaqyrǵan», - dedi oblystyq memlekettik qyzmet isteri departamenti memlekettik qyzmet salasyn baqylaý basqarmasynyń bas mamany Lázzat Qonaeva.
Ádep keńesi kezinde Áıteke bı aýdandyq bilim bóliminiń basshysy Qanysh Jarymbetov óz kinásin moıyndamady.
«Men – fılologpyn. Meniń qate jazýym múmkin emes. Al maǵan kórsetilgen, men jazdy degen habarlamada qate kóp. Bul baǵyt boıynsha qylmystyq is toqtatyldy. Men óz kinámdy moıyndamaımyn», - dedi Qanysh Jarymbetov.
Ádep keńesi Áıteke bı aýdandyq bilim bóliminiń basshysyn jumystan shyǵarý túrindegi tártiptik jaza qoldaný týraly sheshim qabyldady.