Saýalnamaǵa qatysqandardyń 96 paıyzy saılaý ekonomıkalyq máselelerdi sheshýge yqpalyn tıgizedi dep esepteıdi

ASTANA. QazAqparat - Saýalnamaǵa qatysqandardyń 96 paıyzy kezekten tys parlamenttik saılaý ekonomıkalyq máselelerdi sheshýge yqpalyn tıgizedi dep sanaıdy. Búgin bul týraly Ortalyq kommýnıkatsııalar qyzmetindegi brıfıngte «Qoǵamdyq pikir» zertteý ınstıtýtynyń atqarýshy dırektory Aıgúl Sádýaqasova osylaı málim etti.

«Bir apta boıy ózekti taqyrypty barsha qoǵam talqylap jatyr. Bul turǵyda halqymyzdyń Májilistiń kezekten tys saılaýyna kózqarasy qandaı ekenin bilýge tıisti suraqtardy qoıdyq. Osy oraıda jalpyulttyq irikteý boıynsha telefon arqyly jasalǵan suhbatqa 1200 respondent qatysty. Áleýmettik saýalnama Astana, Almaty jáne barlyq oblystardy qamtydy. Birinshiden, Parlament Májilisine kezekten tys saılaýdy ótkizý boıynsha bastama qalaı áser etip otyrǵandyǵy jáne qazaqstandyqtar osy bastamany qalaısha qoldap otyrǵandyǵy suraldy. Respondentterdiń 93,6 paıyzy bul bastama ýaqytyly jasaldy dep esepteıdi. Sonymen qatar 97,2 paıyzy Elbasynyń besinshi shaqyrylǵan Parlament Májilisin taratý jáne Májilis depýtattarynyń kezekten tys saılaýyn taǵaıyndaý týraly sheshimin qoldap otyr», - dedi A. Sádýaqasova.

Onyń sózine qaraǵanda, respondetterdiń 95,4 paıyzy Ulttyq jospardy júzege asyrý úshin partııalar saılaýshylardyń senim mandatyn alýy kerek ekenin alǵa tartýda.

Munymen qosa, saýalnamaǵa qatysqandardyń 97,2 paıyzy Memleket basshysynyń saýatty, isker jáne eldiń múddesine berilgen kandıdattar usynylýy kerek degen pikirin qoldaýda.

«Atap aıtqanda, saýalnamaǵa qatysqandardyń 96 paıyzy kezekten tys parlamenttik saılaýdy ótkizý ekonomıkalyq máselelerdi sheshýge yqpalyn tıgizedi dep paıymdap otyr», - dep túıdi ol.