Saýalnamaǵa qatysqan azamattardyń 91,2 paıyzy Elbasy ókilettigin uzartý jónindegi referendým ótkizýdi qoldaıdy

ASTANA. 26 qańtar. QazAqparat /Marlan Jıembaı/ - Saýalnamaǵa qatysqan azamattardyń 91,2 paıyzy Elbasy ókilettigin uzartý jónindegi referendým ótkizýdi qoldaıdy. Bul týraly búgin elordada ótken baspasóz máslıhaty barysynda «InfoSystem» zertteý ortalyǵy» qoǵamdyq qorynyń basshysy Janar Boqanova málim etti.

«Saýalnamaǵa qatysqan el azamattarynyń 91,2 paıyzy Memleket basshysynyń Prezıdenttik ókilettigin uzartý jónindegi referendým ótkizýdi qoldaıdy. Al basqasha kózqaras tanytqandar respondentterdiń 3,2 paıyzy, al bul máselege beıtaraptyq tanytqandar 4,8 paıyzdy qurady», - dedi ol.

Onyń atap ótýinshe, saýalnamaǵa qatysqan turǵyndardyń 61,2 paıyzy ortalyq telearnalardan, 50,4 paıyzy jergilikti telearnalardan habardar bolǵan. Sondaı-aq ınternet jelisi men basqa da beıresmı aqparat kózderi arqyly referendým jaıynda estip-bilgender sáıkesinshe, 26,4 jáne 22,6 paıyzdy qurap otyr.

Aıta keteıik, 2010 jyldyń 25 jeltoqsany men 2011 jyldyń 17 qańtary aralyǵynda «InfoSystem» zertteý ortalyǵy Qazaqstan halqynyń áleýmettik-saıası ál-ahýalynyń serpinine áleýmettik zertteýler ótkizgen bolatyn. Saýalnamaǵa elimizdiń 14 oblysy men respýblıkalyq mańyzy bar Almaty, Astana qalalarynan 18-54 jas aralyǵyndaǵy 1600 adam qatysty.