Saýalnama: Uly Otan soǵysynyń batyrlaryn bilemiz be?
Respondentterge 12 batyrdyń fotosýretteri usynyldy. Olardyń qatarynda Hıýaz Dospanova, Málik Ǵabdýllın, Baýyrjan Momyshuly, Raqymjan Qoshqarbaev, Qarsybaı Sypataev, Nıkolaı Tereşenko, Álııa Moldaǵulova, Mánshúk Mámetova, Leonıd Beda, Saǵadat Nurmaǵambetov, Talǵat Bıgeldınov, Nurken Ábdirov syndy eleýli esimder bar.
Saýalnamamyzdyń nátıjesi kóńil kónshiterlik emes - jurt óz batyrlaryn bilmeıtin bolyp shyqty. Soltústik Kavkaz, Kýban, Qyrym, Ýkraına, Belorýssııa, Polsha, Germanııa aspanyndaǵy surapyl shaıqastarǵa qatysyp, nemis áskerine tóbeden qyrǵıdaı tıgen Hıýaz Dospanovany bireýler Nurken Ábdirovpen shatastyryp jatsa, Máskeýdi jaý qolynan saqtap qalǵan ásker basy Baýyrjan Momyshuly kóp rette elenbeı jatty. Kýba kósemi Fıdel Kastronyń tańdaıyn qaqtyrǵan eren er qazaqqa eleýsiz qalǵanyna qynjyldyq. Degenmen, suralǵandardyń ishinen Álııa Moldaǵulova men Mánshúk Mámetovany tanyǵandar tabyldy. Saýalnamaǵa qatysqan adamdarǵa Qazaqstan jerinen soǵysqa attanyp, asqan erlikterimen elge tanylǵan batyrlardyń ómirbaıany men erlikteri jazylǵan paraqshalar taratyp otyrdyq.
Turǵyndardyń aıtýynsha, Uly Otan soǵysynyń batyrlary týraly aqparat óte sırek kezdesedi. Mektepterde de bul taqyryp tereńnen qaýzalmaıdy dep otyr. Sózdiń jany da bar shyǵar, biraq izdeımin dese, kez kelgen málimet jeterlik emes pe degen oıda qaldyq.
Shara Uly Otan soǵysyndaǵy Jeńis kúniniń 70 jyldyǵyna arnalǵan «Máńgi esimizde» atty jýrnalıster arasyndaǵy shyǵarmashylyq baıqaý aıasynda ótken bolatyn. Uly Otan soǵysy taqyrybyndaǵy úzdik jýrnalıstik materıaldy anyqtaıtyn baıqaý Qazaqstan Respýblıkasynda shyǵatyn respýblıkalyq jáne qalalyq buqaralyq aqparat quraldary, sonymen birge elektrondy buqaralyq aqparat quraldary arasynda jekelegen atalymdar boıynsha Qorǵanys mınıstrliginiń muryndyq bolýymen ótkizilýde.
Oǵan Uly Otan soǵysynyń tarıhy, maıdangerlerdiń soǵystan keıingi taǵdyry, tyl eńbekkerleri, UOS ardagerleriniń qoǵamdyq uıymdary, maıdan dalasynda qaza tapqandardy izdestirý týraly materıaldardy jarııalaǵan gazet, radıo men telearna, aqparattyq agenttik tilshileri, sonymen birge shtattan tys avtorlar qatysa alady.
Baıqaý jastardy patrıottyq rýhta tárbıeleý jáne jýrnalısterdi áleýmettik mańyzdy taqyryptardy talqylaýǵa tartý maqsatynda ótkiziledi.