Saýalnama: qazaqstandyqtardyń 93,3 paıyzy Elbasynyń kezekten tys Prezıdenttik saılaý ótkizý týraly sheshimin qoldaıdy
Bul týraly búgin «Qazaqstan halqynyń áleýmettik-saıası kóńil-kúıiniń serpini» áleýmettik zertteýiniń nátıjelerin usynǵan «InfoSıstem» zertteý ortalyǵy» qoǵamdyq qorynyń dırektory Saltanat Ahmetova málim etti.
Saýalnama «Nur Otan» HDP Parlamentarızm ınstıtýtynyń tapsyrysy boıynsha 2011 jylǵy 1-23 aqpan aralyǵynda júrgizildi. Onyń barysynda 14 oblys pen Astana men Almaty qalalarynda 18-63 aralyǵyndaǵy barlyǵy 1624 respondentten saýalnama alyndy.
"Referendýmnan bas tartý týraly sheshim qabyldap, Prezıdent saılaýyn kezekten tys ótkizýdi usynǵan Memleket basshysynyń Qazaqstan halqyna jasaǵan málimdemesi týraly bilesiz be?" degen suraqqa respondentterdiń barlyǵyna derligi, naqty aıtqanda 97,6 paıyzy "bilemin" dep jaýap berdi. Al Elbasynyń kezekten tys Prezıdenttik saılaýdy ótkizý týraly sheshimine qatysty qoıylǵan saýalǵa respondentterdiń 93,3 paıyzy oń pikirin bildirdi. Qalǵan 3,4 paıyzy beıtaraptyq, 1,2 paıyzy qarsy ustanymda boldy», - dedi S. Ahmetova.
S. Ahmetova málim etkendeı, QR Prezıdentin kezekten tys saılaý taǵaıyndaý týraly halyq úshin aqparattyń kózi televızııa bolyp tabylady. (Ortalyq televızııa-68,6 paıyz, jergilikti televızııa - 54,2 paıyz). Ekinshi kezekte ınternet kózderi (42,4 paıyz), úshinshi ortalyq jáne jergilikti baspasóz (sáıkesinshe 33,2 jáne 31,6 paıyz).
Saýalnamaǵa qatysqan respondentterge sondaı-aq eldiń áleýmettik-saıası jaǵdaıyna qatysty saýaldar qoıyldy. Nátıjesinde eldegi jalpy jaǵdaıǵa «qolaıly, birqalypty» dep baǵa bergender sany 89,6 paıyzdy qurady. «Óziniń jáne otbasynyń ómir deńgeıine qanaǵattanatyndardyń sany edáýir joǵary ekeni baıqaldy. Ol saýalnamaǵa qatysqandardyń 81,8 paıyzyn qurady. Tolyq jáne ishinara óz ómirine qanaǵattanbaıtyndardyń jalpy kólemi 16,6 paıyzdy qurady. Respondentterdiń basym bóligi eldegi ekonomıkalyq jaǵdaıǵa oń baǵa berdi. Azamattardyń 90.2 paıyzy aǵymdaǵy ekonomıkalyq jaǵdaı turaqty damý ústinde dep sanaıtyndyqtaryn bildirdi», - dedi ol.
Suraqtardyń úshinshi legi Qazaqstan Prezıdenti N. Nazarbaevtyń Joldaýyna qatysty boldy. Elbasynyń «Bolashaqtyń irgesin birge qalaımyz!» atty Joldaýy jumys kúni joldanǵanyna qaramastan, halyq arasynda júrgizilgen saýalnama bul oqıǵa jóninde habardar bolǵanyn kórsetip otyr.
«Jasyna, ulty men turatyn jerine qaramastan saýalnamaǵa qatysqan azamattardyń 91,4 paıyzy Elbasynyń jyl saıynǵy Joldaýyn el úshin ǵana emes, sonymen birge jeke ózi úshin de mańyzdy oqıǵa dep biletinin aıtty»,-dedi qor dırektory.