Satyp alýlardyń jańa erejesi: «Samuryq-Qazyna» bes aıda 1,5 mlrd teńge únemdedi

ASTANA. QazAqparat - «Samuryq-Qazyna» Qory satyp alýlardyń jańa erejesi arqasynda 1,5 mlrd teńgege jýyq qarjy únemdedi, dep habarlaıdy QazAqparat.

«Samuryq-Qazyna» Qory satyp alýlardyń jańa formatynyń arqasynda 5 aıda shamamen 1,5 mlrd teńge únemdedi. Buǵan qarjyny tıimdi jumsaýǵa, sondaı-aq satyp alý sharalarynyń ashyqtyǵyn arttyryp, básekelestikti keńeıtýge baǵyttalǵan jańa erejeler sep boldy», - dep atap ótti «Samuryq-Qazyna Kontrakt» JShS-dan.

Satyp alýlar baǵa usynysyn suraý arqyly ótken. Osylaısha, shaǵyn jáne orta bıznes ókilderi belsendi qatysqan protsedýra Qordyń enshiles kompanııalaryna qarjyny únemdeýge múmkindik bergen. Shara www.zakup.sk.kz portalynda ótti. Nátıjesinde kompanııalar aǵymdaǵy jyldyń aqpan aıynan beri satyp alýlarǵa josparlanǵan 8,2 mlrd teńgeniń ornyna, 6,7 mlrd teńge ǵana jumsady.

«Aıta keteıik, aǵymdaǵy jyldyń sáýir aıynan bastap 9,6 mln teńgege deıingi baǵa usynysyn suraý arqyly ótetin satyp alýlar biliktilik boıynsha irikteý sharasynan bosatyldy. Sonymen qatar, holdıngke kiretin kooperatsııalar aıasynda jyl saıyn shaǵyn jáne orta bıznes ókilderi 300-350 mlrd teńgege tapsyrys alýǵa múmkindik aldy. Bul sharalar tapsyrystardy oryndaýshylar arasynda básekelestikti arttyryp, satyp alýlardy áldeqaıda ashyq ári tıimdi ótkizýge negiz bolmaq», - dep atap ótti kompanııadan.  

Aǵymdaǵy jyldyń aqpan aıyna deıin baǵa usyný arqyly ótetin satyp alýlar tender.sk.kz portalynda júzege asyrylatyn. Protsedýraǵa qatysýshylarǵa tirkelý úshin qujat jınap, 5 kún jaýap kútýge týra keletin. Al www.zakup.sk.kz portalyna kez kelgen adam elektrondy qujattardy usyný arqyly ózdiginen tirkele alady. Bul ózgerister qatysýshylardyń sanyn arttyryp, tirkelý sharasyn birshama jeńildetti.

Esterińizge sala keteıik, «Samuryq-Qazyna» UÁQ» AQ basshysy Ahmetjan Esimovtiń tapsyrmasymen satyp alý sharalaryn ońtaılandyrý jumystary júrgizilýde. Atap aıtsaq, satyp alýlardy ashyq ári qoljetimdi etý maqsatynda kelesi sheshimder qabyldandy: 

• Tapsyrystardy oryndaýshylar úshin biliktilik boıynsha aldyn ala irikteýdiń anketalyq suraqtary 2 ese qysqardy;
• Biliktilik boıynsha aldyn ala irikteý sharasyn reglamentteý maqsatynda irikteýden ótý merzimi 45 kúnnen 18 kúnge deıin shamamen 2,5 esege qysqartyldy;
• Tenderlerdi ótkizý merzimi 65 kúnnen 33 kúnge deıin eki ese qysqardy;
• Baǵa usynysyn suraý arqyly ótetin satyp alýlardy ótkizý 21 kúnnen 15 kúnge deıin azaıdy.

 www.zakup.sk.kz jańartylǵan elektrondy satyp alý portaly 2018 jyldyń aqpan aıynda iske qosyldy. Osy ýaqyt aralyǵynda onda 15 myńnan astam tapsyrys berýshi tirkeldi.