Satylýǵa jatatyn taǵy 100 memlekettik kásiporyn tabyldy
«Jekeshelendirýge 783 nysan engizildi. Degenmen jyl saıyn biz qaıta tekserister jasap, bul tizimdi keńeıtýdemiz. Bıyl biz 100-ge tarta, múmkin odan da kóp nysandy qosymsha engizetin bolamyz. Jalpy eki jylda jekeshelendirý aıasynda 150 nysan satylyp ketti. Munda bir máseleni túsingen jón, nysandy daıyndyqtan ótkizbeı, belgili bir mindettemelerden tazartpaı, qalypqa keltirmeı ony satý óte qıyn. Oǵan birshama ýaqyt ketedi», - dep atap ótti QR Ulttyq ekonomıka mınıstri Tımýr Súleımenov Úkimet otyrysynan keıin ótkizilgen baspasóz máslıhatynda.
Onyń aıtýynsha, memlekettiń menshigindegi qajetsiz aktıvterdi satylymǵa shyǵarý arqyly el bıýdjeti aqshaǵa tolyp qana qoımaı, bızneske ekonomıkalyq keńistik aıasyn keńeıtýge jol ashylady.
Qorytyndy soma, mınıstrdiń aıtýynsha, negizgi strategııalyq aktıvterdiń ótkizilgen baǵasyna baılanysty bolmaq.
«QazMunaıGaz, «Qazatomónerkásip», «Qazaqstan temir joly» ulttyq kompanııalarynyń beligili bir aktsııa kólemderi saýdaǵa shyǵarylady. Olar IPO arqyly ótkizilmek. Sondyqtan olardan qansha qarajat túsetinin boljaý qıyn. Olar 2018-20 jyldary saýdaǵa shyǵady», - dedi Tımýr Súleımenov.
QR Ulttyq ekonomıka mınıstri suranysy tómen aktıvterge de toqtaldy.
«Olardy satý úsh satyda júredi: Birinshisi: naryqtyq baǵa bar, aýktsıon bastalady, kim joǵary baǵa usynsa, sol jeńedi. Eger ol satylmasa, ekinshi kezeń qosylady: baǵa naryqtyq qunynan 50 paıyzǵa deıin tómendetiledi. Úshinshi kezeńde, nysan quqyn oǵan bireý óz baǵasyn usynbaıynsha tómendetile beredi. Eger ol kezde de satylmaıtyn bolsa, keıbir nysandar joıylady. ıAǵnı memleketke tıimsiz, paıdasy joq nysandar jabylady», - dedi ol.