«Sátti juldyz» lotereıasynyń ókili: Biz áli taza tabysqa shyǵa almaı otyrmyz
BAQ ókiliniń suraǵyna áýeli Týrızm jáne sport vıtse-mınıstri Mıras Tólebaev jaýap berdi.
«Jańa men aıtyp óttim, aınalymy 356 mlrd teńge boldy. Biraq ol aınalymdy tabys dep aıtýǵa bolmaıdy. Nege deseńizder, osy aınalymnyń 85 paıyzy júlde qoryna qalyptastyrýǵa joldanǵan bolatyn. Ekinshiden, onyń ishinen 5 mlrd teńgeden astam salyq tólengen. Onyń ishinde „Qazaqstan halqyna“ qoǵamdyq qoryna 5 mlrd teńge joldandy. Odan bólek Sport qoryna da 5 mlrd teńgeden astam qarajat berilgen», — dedi vıtse-mınıstr.
«Sátti juldyz» lotereıa operatorynyń ókili Shynbolat Pazyl bul jaýapty tolyqtyrǵandaı boldy.
«Sátti juldyz» ulttyq lotereıa kompanııasynyń 2023 jyly jalpy aınalymy 356 mlrd teńgeden asty. Onyń ishinde jeńimpazdarǵa tólengen soma — 305 mlrd teńge. Endi bul jerde qalǵan aqsha bıletterdiń óndirisine ketedi, qyzmetkerlerge tólenetin aqsha bar. Odan bólek «Qazaqstan halqyna» qoryna taza tabystan 10 paıyz toqsan saıyn aýdaryp otyramyz. Sport qoryna 10 paıyz aýdarý da - bizdiń mindetimiz. 5 mlrd teńge salyq tólengeni aıtyldy. Bul jerde kópshilik túsinbeı jatady. Operatordyń aınalymy taza tabysy emes. Qolymda sońǵy derek bar. Ulttyq operator qurylǵan kúnnen bastap 2023 jyldyń alty aıyn qosa alǵanda 16,5 mlrd teńge ınvestıtsııa quıylǵan. Sol 2023 jyldyń 6 aıyn qosa alǵandaǵy derek boıynsha kompanııa áli taza tabysqa shyqpaǵan. Investorlar áli 4,5 mlrd teńgesin qaıtaryp alǵan joq. Bul — resmı aqparat», — dedi ulttyq operator ókili.