Sátbaevta saýda ortalyǵynyń aldynda er adamdy atyp ketti

SÁTBAEV. QazAqparat - Ulytaý oblysynyń Sátbaev qalasynda kóshede er adamdy atyp ketti, dep habarlaıdy QazAqparat tilshisi.

Oqıǵa búgin tal túste Sátbaev qalasynyń ortalyǵynda ornalasqan «Ulytau mall» saýda úıiniń aldynda boldy. Saldarynan bir adam aýrýhanaǵa jetkizildi.

«Jaraqat alǵan 1998 jyly týǵan azamat Jezqazǵan qalasyndaǵy oblystyq kópbeıindi aýrýhananyń qabyldaý bólimine jetkizildi. Atylǵan oqtan oń jambasyna jáne jynys múshelerine zaqym kelgen. Sonymen qatar arqa tusy men eki jaýyryn aralyǵyna pyshaq jaraqaty salynǵan. Hırýrgter kómek kórsetip jatyr», - dep málim etti Ulytaý oblysynyń densaýlyq saqtaý basqarmasynan.

Ázirge oqıǵanyń mán-jaıy belgisiz. Tártip saqshylary tergeý amaldaryna kiristi.

«Atalǵan fakti boıynsha qylmystyq is qozǵaldy. Qazirgi ýaqytta kúdiktini anyqtaý jáne ustaý boıynsha jedel-izdestirý sharalary júrgizilip jatyr. Oqıǵanyń mán-jaıy anyqtalýda», - dep habarlady Ulytaý oblystyq Polıtsııa departamentiniń baspasóz qyzmetinen.