Sátbaev turǵynyn atyp ketti degen kúdikpen taǵy birneshe adam ustaldy

SÁTBAEV. QazAqparat – Ulytaý oblysynyń Sátbaev qalasynda er adamdy atyp ketý qylmysyna qatysy bar degen kúdikpen taǵy birneshe adam ustaldy, dep habarlaıdy QazAqparat Polisia.kz saıtyna silteme jasap.

Qylmys 18 qazanda bolǵan edi. Sátbaev qalasynyń turǵynyn óltirýge oqtalýmen ushtasqan buzaqylyq faktisinen keıin QR ІІM-de tergeý-jedel toby qurylyp, kómek kórsetý úshin Ulytaý óńirine jiberilgen.

«Qabyldanǵan sharalardyń nátıjesinde atalǵan qylmysty jasady degen kúdikpen 5 adam ustalyp, ýaqytsha ustaý ızolıatoryna qamaýǵa alyndy. Janjaldyń sebepteri anyqtaldy, qylmys quraly tárkilendi», - delingen polıtsııa habarlamasynda.

Málim etilgendeı, qazir Sátbaev qalasynda «Quqyqtyq tártip» jedel-profılaktıkalyq is-sharasy ótip jatyr.

«Onyń sheńberinde qoǵamdyq oryndarda jáne kóshelerde quqyq buzýshylyqtar men qylmystardyń aldyn alý jáne jolyn kesý boıynsha jumys jandandyryldy, oıyn-saýyq mekemeleriniń mańynda jáne azamattardyń kóp jınalatyn basqa da oryndarynda patrýldeý uıymdastyryldy.

Budan bólek, atys qarýyna ıe turǵyndar tekserildi. Ony saqtaý sharttaryn buzýdyń 23 faktisi anyqtaldy. Nátıjesinde 23 atys qarýy tárkilenip, olardyń ıeleri ákimshilik jaýapkershilikke tartyldy», - delingen usynylǵan aqparatta.

Sonymen qatar qalada avtojoldardy patrýldeý kúsheıtildi.

Eske salaıyq, qylmys 18 qazan kúni tal túste Sátbaev qalasynyń ortalyǵynda ornalasqan «Ulytau mall» saýda úıiniń aldynda boldy. Saldarynan bir adam oq jáne pyshaq jaraqattarymen aýrýhanaǵa tústi. Kúdikti retinde 2 adam ustalǵan bolatyn. Dárigerler aýrýhanaǵa jetkizilgen 24 jastaǵy jigittiń jaǵdaıyn aıtty.