Sátbaev turǵynyn atyp ketti degen kúdikpen eki adam ustaldy

ASTANA. QazAqparat – Ulytaý oblysyndaǵy Sátbaev qalasynda kóshede er adamdy atqan oqıǵaǵa baılanysty 2 kúdikti ustaldy, dep habarlaıdy QazAqparat POLISIA.KZ telegram kanalyna silteme jasap.

Jedel izdestirý is-sharalary barysynda polıtsııa qyzmetkerleri 18 jáne 20 jastaǵy eki adamdy ustady. Onyń biri – kólik júrgizgen bolsa, ekinshisi – boljam boıynsha jábirlenýshige oq atqan. Ustalǵan kúdikti kinásin moıyndady.

Aldyn ala boljam boıynsha Ulytau Mall saýda úıiniń aldynda jas jigitter sózge kelip qalady, sońy tóbeleske ulasqan. Oqıǵa ornynda kúdiktilerdiń biri 24 jastaǵy azamatqa oq atyp, avtokólikpen izin jasyrǵan. Jábirlenýshi aýrýhanaǵa jetkizildi.

Atalǵan fakt boıynsha Qazaqstan Respýblıkasy Qylmystyq Kodeksiniń 24-99 babyna sáıkes qylmystyq is qozǵaldy. Aıǵaq zattar tárkilendi. Kúdikti ýaqytsha ustaý ızolıatoryna qamalyp, tergeý amaldary bastaldy.

Oqıǵaǵa qatysy barlardyń barlyǵynyń jeke bastary anyqtaldy. Qazirgi ýaqytta olardy ustaý boıynsha keshendi sharalar júrip jatyr.

Eske salsaq, keshe Sátbaev qalasynda saýda ortalyǵynyń aldynda er adamdy atyp ketkeni habarlanǵan bolatyn.

Foto: t.me/POLICE_of_KZ