Sátbaev qalasyndaǵy tútinge baılanysty ekologııalyq tekserý júrgiziledi
00:34, 10 Naýryz 2023
SÁTBAEV. QazAqparat – Sátbaev qalasyndaǵy qazandyq murjasynan shyqqan tútinge baılanysty ekologııalyq tekserý júrgizilmek. Bul týraly QazAqparat Ulytaý oblysynyń ákimdigine silteme jasap habarlaıdy.
«Áleýmettik jelilerde Sátbaev qalasynyń qazandyq murjasynan (Jylý energetıkasy kásiporny) qalyń qara tútin shyǵyp jatqany týraly aqparat taraýda. Jylytý maýsymy kezinde qaladaǵy 4 qazandyqtan 360 myń tonna kómir jaǵylǵan. Osyǵan baılanysty kóp mólsherde tútin shyǵarylýy múmkin.Osyǵan oraı arnaıy ekologııalyq tekserý júrgiziletin bolady. Onyń nátıjeleri jaqyn arada jarııalanady», - delingen ákimdik habarlamasynda.