Sátbaev qalasynda mas adam jedel járdem kóligin urlap áketip, aýdaryp tastaǵan
18 qyrkúıek kúni tańǵy saǵat 5.30 shamasynda Ulytaý oblysy Sátbaev qalasynyń polıtsııa bólimine belgisiz bireý medıtsınalyq mekemeniń turaǵynda turǵan jedel járdem kóligin urlap ketkeni týraly habar túsken.
Dárigerler naýqasty aýrýhanaǵa aparyp, júrgizýshi naýqasty jedel járdem bólimine jetkizýge kómektesken.
Osy sátti paıdalanǵan belgisiz bireý qyzmettik kóliktiń kabınasyna otyryp, ony otaldyrady da, belgisiz baǵytqa ketip qalǵan.
Sátbaev patrýldik polıtsııa vzvodynyń jedel-izdestirý sharasy barysynda kúdikti 32 jastaǵy er adamdy ustady, ol kólikti basqara almaı, aýdarylyp qalǵan.
Onyń ústine kúdikti kólikti urlaǵan kezde mas bolǵany medıtsınalyq saraptamada rastalǵan.
Kúdiktige qatysty QR QK-niń 608-baby boıynsha ákimshilik materıal toltyryldy, sonymen qatar QR QK-niń 200-baby boıynsha sotqa deıingi tergeý bastaldy.