Sátbaev qalasynda 45 kópbalaly otbasy baspanaly boldy

NUR-SULTAN. QazAqparat - Sátbaev qalasynda 45 kóp balaly otbasy «Nurly jer» baǵdarlamasy boıynsha páter aldy. Jańa qonystanýshylarǵa qala ákimi Asqar Ydyrysov kiltterin tabys etti, dep habarlaıdy oblystyq ákimdiktiń baspasóz qyzmeti.

Kenjegúl Ahmetova — bes balanyń anasy. Turǵyn úı kezeginde otbasy 2013 jyldan beri turǵan. Endi olardyń úsh bólmeli páteri bar.

«Meniń kópjyldyq armanym júzege oryndaldy. Osyǵan deıin birneshe jyl boıy páter jaldap turyp keldik. Endi mine ózimizdiń baspanamyz bar. Men bizdiń januıamyz sekildi otbasylarǵa kómekteskenderdiń barlyǵyna alǵysymdy aıtqym keledi», - deıdi Kenjegúl Ahmetova.

Sondaı-aq, tórt balanyń anasy Jaınagúl Muhametjanova da óz qýanyshymen bólisti: «Bıylǵy jyl biz úshin qýanyshqa toly boldy. Búgin biz óz baspanamyzdy aldyq. Kezekte 11 jyl turdyq. Balalardyń qýanyshynda shek joq, páterimiz jaqsy, jyly. Barlyqtaryńyzǵa úlken rahmet».

Sátpaev qalasynda «Baqytty otbasy» baǵdarlamasy da belsendi damyp keledi. Ol boıynsha tómen paıyzdyq mólsherlememen nesıe alýǵa 19 ótinim maquldandy. Turǵyn úıdi osy baǵdarlama boıynsha erekshe qajettilikteri bar balalardy tárbıelep otyrǵan úsh kópbalaly otbasy men ata-analar satyp aldy.

Jyl sońyna deıin taǵy 4 kóp balaly otbasy baspana alady.