Sátbaev qalasynda jer silkingen joq — TJM

<p>ASTANA. KAZINFORM — Seısmıkalyq stantsııalar jelisi Sátbaev qalasynda jer silkinýin tirkegen joq. Bul týraly Tótenshe jaǵdaılar mınıstrligi málimdedi. </p>

«14 aqpan kúni saǵat 12:21-de Ulytaý oblysynyń Sátbaev qalasynda «Qazaqmys» JShS bas geomehanıginen Ońtústik Jezqazǵan kenishiniń jumys istep turǵan № 65 shahtasynda bos oryndardy májbúrlep josparly óteý bolǵany týraly habarlama tústi, sonyń saldarynan sezilmegen seısmıkalyq oqıǵalar tirkeldi. Zardap shekkender týraly aqparat túsken joq. Oqıǵa ornyna TJD qyzmetkerleri (shamamen 20 km qashyqtyq) shyqty. QR TJM Seısmıkalyq stantsııalar jelisi osy kezeńde jer silkinisin tirkegen joq», — delingen habarlamada.