Sátbaev qalasy tútin men kúıeniń astynda qaldy
Sátbaev turǵyndary qaladaǵy ekologııalyq problemaǵa shaǵymdanýda. Áleýmettik jelilerde birneshe beınejazba paıda boldy, onda avtor muz aıdyny qoıý qara kúıeniń astynda qalǵanyn kórsetedi, al ekinshi beınejazbada avtokólik ıesi kóligi qara shańǵa oranǵanyn túsirgen.
Qalanyń basty qazandyǵy «Qazaqmys» korporatsııasynyń balansynda bolǵandyqtan, kásiporyn qala ákimdigimen birlesip, ekologııalyq problemanyń oryn alý sebebin túsindirdi.
Olardyń aıtýynsha, jylý kóziniń barlyq jabdyqtary áldeqashan eskirgen.
«Jyl saıynǵy jóndeýge qaramastan, 1962 jyly paıdalanýǵa berilgen negizgi jabdyq aıtarlyqtaı tozǵan jáne gaz tazartý júıeleri tolyǵymen eskirgen jáne zamanaýı ekologııalyq standarttarǵa sáıkes kelmeıdi, bul aıtarlyqtaı ınvestıtsııany qajet etedi. 2024 jyly jylýmen úzdiksiz qamtamasyz etýge baǵyttalǵan aýqymdy jóndeý jumystary júrgizildi. Ótken jylǵy jóndeý jumystaryna jumsalǵan shyǵyndardyń jalpy somasy 1,6 mlrd teńgeni qurady», - dep málimdedi Sátbaev qalasynyń ákimdiginen.
Qazandyqty jóndeýge qomaqty qarajat jumsalǵanyna qaramastan, negizgi jabdyq – gaz tazartý júıesi joq. Bul máselemen «Qazaqmys» korporatsııasy aınalysyp jatyr, deıdi ákimdiktegiler.
«Qazirgi ýaqytta jylý energııasy kásiporny ekologııalyq kórsetkishterdi jaqsartýǵa jáne keshendi ekologııalyq ruqsat alýǵa baǵyttalǵan eń úzdik qoljetimdi tehnologııalardy engizý boıynsha belsendi jumys isteýde. Eń mańyzdy joba gaz tazartý júıesin ornatý bolyp tabylady», - dep tolyqtyrdy qala ákimdigi.
Sondaı-aq, jergilikti bılik ekologııalyq máseleni qalany gazdandyrý arqyly sheshpekshi. Alaıda, bul joba qashan júzege asyrylatyny áli belgisiz.
Buǵan deıin Sátbaev qalasyndaǵy Jezqazǵan kenti taratylatyny belgili bolǵan.