Saryarqa tósindegi ekzotıkalyq gúl beınesindegi ǵımaratty bilesiz be
Manfredı Nıkolettı (Manfredi Nicoletti) Italııanyń dál ortasyndaǵy Rıettı qalasynda dúnıege kelgen. Búginde tanymal sáýletshi Italııadan bólek birneshe memlekette 25-ke jýyq tańǵajaıyp nysandardy jobalaǵany belgili. Ol - álemdegi eń ozyq jobalaýshy ǵana emes, sondaı-aq qurylysynyń tabıǵı prıntsıpterimen álemge tanymal bolǵan qazirgi zamanǵy eń talap etiletin sáýletshi. Al búkil TMD aýmaǵynda biregeı nysan sanalatyn «Qazaqstan» ortalyq kontsert zaly sáýletshiniń sońǵy jumystarynyń biri eseptelinedi.
«QazAqparat» tilshisimen áńgimelesý barysynda kórermenderge qyzmet kórsetý bóliminiń basshysy Bıbigúl Turǵymbaeva ǵımarat salynar aldynda onyń tóńireginde Aqorda men Mınıstrikter úıinen basqa esh ǵımarat bolmaǵanyn aıtady.
Memleket basshysy Nursultan Nazarbaevtyń ıdeıasymen salynǵan biregeı ári teńdesi joq «Qazaqstan» ortalyq kontsert zaly ozyq tehnologııalarmen jabdyqtalǵan. Onda álemdik jáne otandyq kontsertter, saltanatty is-sharalar men resmı kezdesýler, kórmeler men konferentsııalar ótkizilip turady. Ǵımaratty Qazaqstan Prezıdenti 2009 jyldyń 16 jeltoqsanda saltanatty túrde ashqan bolatyn. 2016 jyldan bastap bul ǵımaratta elimizdiń eń iri kontserttik uıymy - «Qazaqkontsert» eńbek etýde.
Ǵımaratta eń mańyzdy oryndy 3 myńǵa jýyq sharshy aýmaqty alyp jatqan pıatstsa-foıe alady. Pıatstsa-foıe - qonaqtardyń bos ýaqytyn tıimdi ótkizip, kóńil kóterýine negizdelgen yńǵaıly da jaıly demalý alańy. Ǵımaratqa kirgen bette aldyńyzdan dombyranyń shanaǵy shyǵady. Aıta keterligi, mundaı kórinistiń oryn alýy da tegin emes.
«Qazaqstannyń mádenıetimen jan-jaqty tanysqan maestro dombyranyń únine tánti bolyp, zaldyń syrtqy pishinin qazaqtyń mýzykalyq aspaby túrinde jasaýǵa sheshim qabyldaǵan eken», - dedi Bıbigúl Turǵymbaeva.
Kórermen zaly arena ispetti. Zal, naqty aıtsaq, bul bútin atrıým, mýzykalyq aspap úlgisinde jasalǵan jáne sımfonııalyq kontsert bolsyn, opera ne kınokórsetilim bolsyn, kez kelgen shoýǵa beıimdele alady. Munda barlyq jańa tehnologııalar jınaqtalǵan jáne eshqandaı da artyq materıal nemese tigin joq. Atrıým ishki jáne syrtqy jaǵynan akýstıkaǵa esh kedergisiz óziniń mindetin atqarýǵa múmkindik beretin arnaıy aǵashpen qaptalǵan. Tipti kontsert zalynyń edeni joǵary tozýǵa tózimdi arnaıy parketpen jasalǵan jáne asa beıneli akýstıkalyq beıimdilikpen jatqyzylǵan.
Zal parter (488 oryn), beletaj (543 oryn), balkon (1804 oryn) jáne galereıa (396 oryn) dep atalatyn 4 sektorǵa bólingen. Sondaı-aq atrıýmnyń tıimdi bir qasıeti kózge kishkene bolyp kórinýin atap ótken jón. Bul jeke aspaly perdelerdiń arqasynda júzege asyrylady, olardy tóbe fermalaryna bekitkende zaldyń joǵary deńgeıi - galereıany alyp tastaýǵa, sondaı-aq zaldyń úshinshi deńgeıi balkondy alyp, jaýyp tastaýǵa bolady. Osy arqyly úsh jarym myń orynǵa arnalǵan zal jep-jeńil eki myń orynǵa arnalǵan zalǵa aınalyp shyǵa keledi.
Aralyq pýlt arqyly bir adammen basqarylatyn kóp fýnktsııaly sahnanyń aldyńǵy jaǵynda orkestrge arnalǵan shuńqyr ornalasqan, onyń túsý jáne kóterilý ýaqyty 4 mınýtty quraıdy. Orkestr shuńqyrynyń tereńdigi 4,5 metr bolady jáne orkestr úshin jeke shyǵar esikter qarastyrylǵan. Sahnanyń artqy jaǵy horǵa arnalǵan jáne 7 hor ıarýsynan turady, olar da aralyq pýlt arqyly basqarylady jáne tolyq kóterilgende bıiktigi úsh metrge deıin jetedi.
Sahnanyń ústinde, onyń eń ortalyq núktesinde jalpy qýaty 25 kılovatt «Renkus-Heinz» Amerıka fırmasynyń dybystyq klasteri ornalasqan. Sondaı-aq zaldyń perımetri boıynsha 12 mańdaı aldy kolonkalar ornalasqan, olar dybysty týra barlyq baǵyt boıynsha taratady jáne ár sektorǵa jetkizedi. Akýstıkalyq júıeniń maqtanyshy arnaıy ıtalıan tehnologııasy boıynsha jasalǵan, mindeti ártúrli burysh kólbeýlerin ala otyryp, kontserttiń akýstıkalyq dybystalýyn tolyq jetildirýge arnalǵan 22 úlestirgish-gúl japyraǵy bolyp tabylady.
Eger qabyrǵaǵa nazar aýdaratyn bolsaq, onda arnaıy akýstıkalyq tartylý men dybysty keri baǵyttaıtyn áseri bar qabyrǵalyq perdelerdi kórýge bolady. Perdelerdi basqarý arnalǵan baǵdarlamasy bar jeke kompıýter arqyly júzege asyrylady. Dybysty qabyldaýdy jaqsartý úshin arnaıy akýstıkalyq qondyrma sondaı-aq kontsert zalynyń kreslolarynyń tómengi jaǵynda ornalasqan.
Ǵımaratta úsh kórinisti lıft, kıim iletin 2 oryn, taýarlardyń eksklıýzıvti túrlerin usynatyn segiz býtık, tehnıkanyń sońǵy sózimen jabdyqtalǵan 200 jáne 300 oryndarǵa arnalǵan eki konferents-zal, 250 orynǵa arnalǵan kameralyq zal, qoǵamdyq tamaqtaný oryndary bar.
Jyl saıyn bul ǵımaratta 100-ge jýyq kontsert ótip, ony 200 myńnan astam adam tamashalaıdy.