«Saryarqa» qubyrynan soltústikke gaz tartý ońtústikti tyǵyryqqa tireýi múmkin – Roman Sklıar

ASTANA. QazAqparat – Premer-Mınıstrdiń orynbasary Roman Sklıar Májilis depýtattarynyń saýlayna joldaǵan jaýabynda Soltústik Qazaqstan jáne Aqmola oblystaryn «Saryarqa» magıstraldik qubyry arqyly gazben jabdyqtaý jobasy ózektiligin joıǵanyn aıtty, dep habarlaıdy QazAqparat tilshisi.

«Sizderdiń saýalyńyzda aıtylǵandaı, soltústik aımaqtardy gazdandyrýdyń eki nusqasy qarastyrylǵan. «Saryarqa» magıstraldyq gaz qubyrynan gazdandyrý nusqasy boıynsha 2022 jylǵy maýsymda «AstanaGaz QMG» AQ Aqmola jáne Soltústik Qazaqstan oblystaryn gazdandyrýdy kózdeıtin «Saryarqa» MGQ 2, 3-kezeńderin salý» jobasyna tehnıkalyq-ekonomıkalyq negizdemeni túzetti. Ázirlengen jobaǵa sáıkes atalǵan oblystardyń gazdy tutyný kólemi – shamamen 245 myń m³/saǵ nemese jylyna 657 mln m³. Sonymen qatar «Saryarqa» MGQ «Beıneý – Bozoı – Shymkent» gaz qubyryna (budan ári-BBSh gaz qubyry) qosylǵan, ol 2022-2023 jyldardyń kúzgi-qysqy kezeńinde 106%-ǵa júktelgen (jobalyq júkteý 1 720 m³/saǵ bolǵan kezde, naqty júkteme 1 820 myń m³/saǵ qurady)», - delingen jaýapta.

Aıtýynsha, bul jaıt Soltústiktegi óńirlerdi gazdandyrýdyń basqa joldaryn pysyqtaýdy qajet etip otyr.

«Osyǵan baılanysty atalǵan oblystardyń aıtarlyqtaı tutyný kólemin eskere otyryp, jobany iske asyrý elimizdiń ońtústik óńirlerin gazben jabdyqtaıtyn negizgi gaz arterııasynyń turaqty jumysynyń buzylýyna ákelýi múmkin.

Qoldanystaǵy gaz qubyrynyń ótkizý qabiletin keńeıtý maqsatynda «QazaqGaz» UK» AQ BBSh gaz qubyrynyń 2-shi tizbegin jobalaý boıynsha jumystardy bastady, onyń aıaqtalý merzimi aǵymdaǵy jyldyń sońyna deıin. Soltústik óńirlerdi gazdandyrýdyń birneshe nusqasy qarastyrylýda. Menshikti gaz tasymaldaý júıesi men gaz resýrstarynyń tehnıkalyq múmkindikteri aıqyndalǵannan keıin ońtaıly nusqa ázirlenetin bolady», - deıdi Roman Sklıar.