«Saryarqa» gaz magıstrali soltústik pen shyǵysqa sozylmaq

ASTANA. QazAqparat – Energetıka mınıstri Bolat Aqsholaqov vedomstvonyń keńeıtilgen alqa májilisinde eldiń soltústigi men shyǵysyn kógildir otynmen qamtamasyz etýdiń yqtımal joldaryn atady, dep habarlaıdy QazAqparat tilshisi.

«Eldiń soltústik jáne shyǵys óńirlerin gazdandyrýǵa qatysty birneshe nusqalar pysyqtalýda, atap aıtqanda: «Saryarqa» magıstraldyq gaz qubyrynyń 2-shi jáne 3-shi kezeńderin salý jáne Reseı Federatsııasymen Pavlodar qalasyna tarmaqtalǵan «Barnaýl-Rýbtsovsk-Semeı-Óskemen» magıstraldyq gaz qubyryn salý boıynsha kelissózder júrgizilýde», - dedi Bolat Aqsholaqov.

Sondaı-aq ol Óskemenge tarmaqtalatyn «Omby-Pavlodar-Semeı» gaz qubyryn salý múmkindigi qarastyrylyp jatqanyn eske saldy.

«Bul rette gazdyń resýrstyq bazasy jáne ımporttyq gazdyń quny máselesi tejeýshi faktor bolyp tabylady. Osy baǵyttaǵy jumys jalǵasady», - dedi mınıstr.