«Saryarqa» gaz qubyrynyń qurylysy keste boıynsha júrgizilýde
Zııash Qııaqbaevtyń aıtýynsha, «Saryarqa» magıstraldyq gaz qubyrynyń qurylysy jobasyn iske asyrý úshin «AstanaGaz QMG» kompanııasy qurylǵan. Onyń aktsıonerleri – «Samruq-Qazyna» qory jáne «Báıterek» holdıngi. Osydan týra bir jyl buryn ekonomıkany jańǵyrtý jónindegi memlekettik komıssııada qarjylandyrý shemasy men sharttary bekitilip, joba qurylysynyń jalpy quny 267,3 mlrd teńgeni quraıtynin jetkizdi.
«Qurylystyń bas merdigeri retinde «KazStroıServıs» kompanııasy aıqyndaldy. Ótken jyldyń qarasha aıynda «AstanaGaz QMG» men «QazQurylysServıs» kompanııalary arasynda «Saryarqa» magıstraldyq gaz qubyryn salý týraly shartqa qol qoıyldy. Búgingi kúni jumysqa 2 myńǵa jýyq maman jáne 900 arnaıy tehnıka jumyldyrylǵan. Jalpy, uzyndyǵy 1061,3 shaqyrym bolatyn qubyrdyń 906 shaqyrymyna qubyr ónimderi jetkizildi. Gaz qubyrynyń 885 shaqyrymy nemese jalpy uzyndyǵynyń 83,4 paıyzy dánekerlengen. Dánekerleýdiń ortasha jyldamdyǵy táýligine 6-7 shaqyrymdy quraıdy. Qaraǵandy oblysynda 1 dánekerleý brıgadasy, Aqmola oblysynda 3 brıgada jumyldyryldy», - dedi ol vedomstvonyń alqa otyrysynda.
Departament basshysy gaz qubyrynyń 260-360 shaqyrymdyq ýchaskesinde gıdravlıkalyq synaq jumystary sátti júrgizilgenin aıtty.
«Osy jumystarmen qatar dánekerleý túıisterin jaryq sáýlesinen ótkizý, oqshaýlaý, qubyrlardy transheıaǵa salý, qaıta jabý jumystarynyń da qarqyny qyzý. Jalpy, jumys keste boıynsha júrgizilýde. Osy jyldyń jeltoqsan aıynda barlyq nysandardyń qurylysy aıaqtalady. Ol nysandar: magıstraldyq gaz qubyry, 5 avtomattandyrylǵan gaz taratý stantsııasy, gaz ólsheý stantsııasy jáne baqylaý pýnkti. ıAǵnı, magıstraldyq gaz qubyry Nur-Sultan qalasyna belgilengen merzimde – osy jyldyń jeltoqsan aıynda jetkiziledi», - dep túıdi Zııash Qııaqbaev.