«Saryarqa» gaz qubyryn tartý jumystary qashan bastalady

ASTANA. QazAqparat - «Saryarqa»  gaz qubyryn tartý jumystary osy jyldyń shilde aıynda bastalady. Bul týraly búgin Úkimet otyrysynda Prezıdenttiń 5 áleýmettik bastamasyn júzege asyrý jol kartasyna oraı baıandama jasaǵan QR Energetıka mınıstri Qanat Bozymbaev aıtty, dep habarlaıdy QazAqparat.

Onyń aıtýynsha, Memleket basshysynyń elimizdiń soltústik óńirlerin gazdandyrý tapsyrmasyn oryndaý maqsatynda 7 naýryzda Energetıka mınıstrliginde múddeli memlekettik  organdar, Qyzylorda, Qaraǵandy, Aqmola oblystary jáne Astana qalasy ákimshilikteriniń, «Samuryq-Qazynanyń» qatysýymen keńes ótkizilgen.

«Onda jobany júzege asyrý boıynsha mınıstrlik ázirlegen Jol kartasy maquldanyp, jumys toby quryldy. Sonymen jaýapty memlekettik organdar men kompanııalardy biz mynadaı baǵyttar boıynsha anyqtaýǵa kelistik. Birinshiden, Qyzylorda-Jezqazǵan-Qaraǵandy-Temirtaý-Astana  baǵyty boıynsha magıstraldy gaz qubyrynyń jobalyq-smetalyq qujattamasyn ázirleýdi, bekitýdi jáne jer bólýdi qamtamasyz etý. Jaýapty oryndaýshylar - Energetıka mınıstrligi, Investıtsııalar jáne damý mınıstrligi, Qyzylorda, Qaraǵandy, Aqmola oblystarynyń jáne Astana qalasynyń ákimdikteri, «QazTransGaz» AQ. Merzimi - 2018 jyldyń shildesi», - dedi mınıstr.

Qanat Bozymbaevtyń aıtýynsha, ekinshiden, halyqaralyq qarjy ınstıtýttarynyń qarajattaryn tartý arqyly jobany qarjylandyrýdyń syzbasy men sharttaryn anyqtaý, sonymen qatar «Saryarqa» gaz qubyry arqyly tasymaldanatyn gaz tarıfterin ózgertý jónindegi  máseleleri pysyqtalǵan.

«Jaýapty oryndaýshylar - «Báıterek» holdıngi, Ulttyq ekonomıka, Energetıka, Qarjy mınıstrlikteri, «Samuryq-Qazyna», «QazMunaıGaz», «QazTransGaz».  Merzimi - 2018 jyldyń maýsymy», - dedi ol.

Onyń sózine qaraǵanda, úshishiden, jobany júzege asyrý úshin jobalyq uıymdy qurý nemese anyqtaý  jáne qarjylandyrýdy tartý úshin atalǵan uıymda jarǵylyq kapıtaldy jergilikti deńgeıde qalyptastyrý qajet.

«Jaýapty oryndaýshylar - Ulttyq ekonomıka mınıstrligi, «Samuryq-Qazyna», «QazMunaıGaz», «QazTransGaz».  Merzimi - 2018 jyldyń maýsymy. Magıstraldy gaz qubyrynyń qurylysyna kirisý jáne gaz qubyryn alǵashqy ret  dánekerleýdiń saltanatty rásimi aǵymdaǵy jyldyń shilde aıynyń basyna josparlanýda. Sonymen qatar magıstraldy gaz qubyryn toltyrý jáne tutynýshylarǵa gaz jetkizýdi qamtamasyz etý maqsatynda Qaraǵandy, Aqmola oblystary jáne Astana qalasynyń ákimdikterine gaz taratý jelilerin jobalaýy jáne qurylysyn magıstraldy gaz qubyrynyń aıaqtalýy ýaqytymen sáıkestendirýi qajet. Barlyq jumys 2019-2021 jyldary aıaqtalýy tıis», - dedi ol.

Foto: gorod-novoross.ru