«Saryarqa» gaz qubyry elordadaǵy jylý tarıfine qalaı áser etedi

NUR-SULTAN. QazAqparat – «Saryarqa» gaz qubyry Nur-Sultandaǵy jylý tarıfine qalaı áser etedi? Jylý magıstraline jasalǵan baspasóz týry barysynda tilshilerdiń bul suraǵyna QR UEM Tabıǵı monopolııalardy retteý, básekelestikti jáne tutynýshylar quqyǵyn qorǵaý komıtetiniń tóraǵasy Asan Darbaev jaýap berdi, dep habarlaıdy QazAqparat tilshisi.

«Qoldaǵy málimetke sáıkes, alǵashqy gaz qubyrlary osy jyldyń jeltoqsan aıynda paıdalanýǵa beriledi. Qazirgi ýaqytta gaz qubyry jylý tarıfine qanshalyqty áser etetinin aıtý qıyn. Sebebi, bul jumystardyń ózindik quny, gaz qubyrynyń balanstyq quny jaıly materıal joq. Gazdy jetkizý jumysymen «QazTransGaz» kompanııasy aınalysyp jatyr. Olarda naqty tasymaldaý boıynsha búkil Qazaqstanda tarıf quny birdeı. «QazTransGaz» kompanııasy jetkizý qyzmetin senimdi basqarýǵa beretin bolsa, tıisinshe olardyń tarıfteri qymbattaı beredi. Alaıda gazdy jetkizý kúrdeli desek te, tarıftiń ósýine sonshalyqty áser ete qoımaıdy. Sol sebepti sońyna deıin jetkizile qoımaǵan jumysqa baılanysty aldyn ala birdeńe deý qıyn», - dedi Asan Darbaev.

Komıtet tóraǵasynyń aıtýynsha, astanaǵa gaz kelgennen keıin jylý tarıfiniń naqty qalaı ózgeretinin boljaýǵa áli erte.

Eske sala ketsek, buǵan deıin elordada jylýǵa jaýapty «Astana-Teplotranzıt» AQ 2020 jyldyń 1 qańtarynan bastap tarıfti 18 paıyzǵa kóterýdi suraǵaly otyrǵanyn habarlaǵan bolatynbyz. Al «Astana-Teplotranzıt» AQ basshysynyń qurylys jónindegi orynbasary Qurmanǵazy Nuǵymanovtyń aıtýynsha, astananyń jylý magıstraldaryn jańǵyrtý jumystary 1 qazanda aıaqtalady.