Saryaǵashta depýtattar «Aýyl – el besigi» jobasynyń mańyzyn túsindirdi
QR Parlamenti Májilisiniń depýtattary Qudaıbergen Erjan, Ýálıhan Qaınazarov jáne Muhtar Erman jergilikti halyqpen kezdesý barysynda ustazdardyń mártebesin kóterý, kópbalaly otbasylarǵa jańa formatta turaqty járdemaqy berý, az qamtylǵan otbasylarǵa ataýly áleýmettik kómek berý erejeleri jaqsara túskenin atap ótti.
QR Prezıdenti Qasym-Jomart Toqaevtyń saılaýaldy baǵdarlamasyndaǵy mindetter naqty júzege asa bastaǵanyn málimdedi. 2020 jyldyń 1 qańtarynan bastap mindetti medıtsınalyq saqtandyrýdy engizý jumysy bastalǵanyn jáne partııanyń «Aýyl – el besigi» jobasynyń mańyzdylyǵyn da atap ótti. Depýtattar sondaı-aq, Jibek joly aýylyndaǵy «Agrotýr» sharýa qojalyǵynda da boldy. Eki jyl buryn qurylǵan sharýa qojalyǵynda túrkııalyq tehnologııa qoldanylady. Munda túrli kókónisterdiń kóshetteri ósirilip, dán sebý jumysy avtomattandyrylǵan.
Sharýa qojalyǵynyń basshysy Tursyn Tashodjaevtyń aıtýynsha, óńirdegi jylyjaılar osynda kókóniske aldyn-ala tapsyrys beredi. Sharýa qojalyǵynyń jumysyn joǵary baǵalaǵan depýtattar Túrkistan oblysynda aýyl sharýashylyǵyn damytýǵa múmkindik mol ekenin aıtty. Osynda kásipkerlermen júzdesken zań shyǵarýshy organ ókilderi jýyrda qoldanysqa engizilgen zańdar elimizdiń damýyna oń serpin beretinin jetkizdi.
Jumys oryndaryn ashý, kásipkerlikti damytý, aýyl sharýashylyǵyn jandandyrý, qoldanysqa engizilgen jańa zań baptary Saryaǵash aýdany, Darbaza aýylyndaǵy «Fırma Saken» JShS aýmaǵyndaǵy kezdesýde de sóz boldy. Osynda aýyl turǵyndarymen júzdesken depýtattar Baıdildá Jylqyshıev, Sáken Qanybekov jáne Mansurhan Mahambetov memleket tarapynan qolǵa alynǵan bastamalar jóninde pikir almasty. Kásipkerlikti, aýyl sharýashylyǵyn jandandyrýǵa baǵyttalǵan jeńildikter men sýbsıdııalar jaıy da áńgime arqaýyna aınaldy. Depýtattar Saryaǵash qalasyndaǵy 5 qabatty 13 turǵyn úıdiń qurylys barysymen tanysty. «Nurly jer» baǵdarlamasy aıasynda qurylysy 2018 jyly bastalǵan úıler bıyl paıdalanýǵa beriledi.
Sonymen birge, depýtattar «Jibek joly» keden beketiniń jumysymen tanysty. Osylaısha, QR Parlamenti Májilisindegi «Nur Otan» partııasy fraktsııasynyń músheleri Túrkistan oblysy aýmaǵyn túgel aralap, jańa zań baptaryn túsindirýmen qatar óńirdegi ózekti problemalarmen tanysty. Osy issaparlar barysynda anyqtalǵan máseleler QR Parlamentinde talqylanady degen jospar bar.