Saryaǵash pen Ordabasyda perınataldyq ortalyq salynady

NUR-SULTAN. QazAqparat – Qazaqstannyń 8 óńirinde perınataldyq ortalyq salynady. Úkimet otyrysynda QR Densaýlyq saqtaý mınıstri Ajar Ǵınııat osyndaı málimet berdi, dep habarlaıdy QazAqparat tilshisi.

«Memleket basshysy atap ótkendeı, búgingi tańda ana men bala máseleleri boıynsha jedel sheshim qabyldaýdy qajet etetin problemalar bar. Osyǵan oraı, júkti áıelder men balalarǵa keshendi, joǵary mamandandyrylǵan medıtsınalyq kómek kórsetý úshin biz Nur-Sultan, Qostanaı, Jezqazǵan, Atyraý, Oral, Shymkent qalalarynda, Túrkistan oblysynyń Saryaǵash qalasynda jáne Ordabasy aýdanynda 8 zamanaýı perınataldyq ortalyq salýdy kózdep otyrmyz, - dedi mınıstr.

Sondaı-aq, ol Úkimettiń keńeıtilgen otyrysynda Prezıdent Qasym-Jomart Toqaevtyń medıtsınalyq saqtandyrý júıesine aıtqan synynan qandaı qorytyndy shyǵarǵandaryn aıtty.

«Medıtsınalyq saqtandyrý júıesin jetildirý úshin biz Qazaqstan Respýblıkasynyń Strategııalyq josparlaý jáne reformalar jónindegi agenttigimen birlesip, mindetti áleýmettik medıtsınalyq saqtandyrý júıesin engizý nátıjelerine taldaý júrgizemiz jáne ony iske asyrýdyń tıimdiligin arttyrý jóninde usynystar engizemiz»,- dedi Ajar Ǵınııat.

Aıta keteıik, keshe Prezıdent Qasym-Jomart Toqaev Úkimetke medıtsınalyq saqtandyrý júıesin jetildirý jóninde usynystar ázirleýdi tapsyrǵan edi.